Ta ngih văn hóa ƀon Mduk, phường Ea Kao, n’gor Đắk Lắk, âk nuĭh ƀon lan tŏng ăp năm deh uănh tâm măt điện thoại, dơi ăp băl đoàn viên-nkre ƀư rmôt nuĭh Rmôt công nghệ mrô ntŭk gŭ rêh-dŭt n’hâm ntĭm trong dăn ƀư tài khoản VNeID. Jêh rnôk nglăp, ăp nuĭh ty nơm ƀư êng, nchih săk bah ăp samƀŭt nơm an ứng dụng. Wa H’Mai Mlô, du hê nuĭh ƀon lan tâm ƀon, nkoch:

Bah năp đaơ mô dơi ăp mon ntĭm ri rwê ngăn, yor nơm mô gĭt ndơ, mô lah chuêl tay. Aƀaơ dơi nchih mbơh hôm. Mô hŏ bên ngăn, yơn dôl nti mbrơi mbrơi.

Ăp nar “nti mrô” kơt aơ lĕ jêng bên ta âk phường, xă bah Đắk Lắk, kơp bah rnôk n’gor rgŏ jă 100 nar ntrong leo hô ngăn “Ƀon lan nti mrô” bah n’gul khay 7. Rlău 200 rmôt công nghệ mrô ntŭk gŭ rêh lĕ dơi ndâk njêng, đah rlău 3.500 cán bộ, đoàn viên, nuĭh kơl kan druh ndăm nchrăp “goh mpông tĭng jay”, “djôt ty ntĭm kan”, kơl nuĭh ƀon lan ƀư bên đah công nghệ.

Mô knŭng rlu tay ta nău kan “jut jăng mô gĭt rplay samƀŭt” nău ƀư bôk năp, ăp rmôt công nghệ mrô ntŭk gŭ rêh hôm pơk luh ăp “njônh mrô” ta ngih văn hóa thôn, ƀon mô lah ntŭk rhŏ hành chính công bah xă. Nuĭh ƀon lan djôt điện thoại tât, dơi ntĭm nglăp n’hanh dŏng ăp ứng dụng hành chính công, joi nu nău neh ntu, ndơ̆ soăy điện tử, mô trok prăk măt. Nô Y Sion Knul, Bí thư Đoàn Druh ndăm xă Ea Na, n’gor Đắk Lắk, an gĭt:

Geh tât nglăp nsum, kônh wa dŭt rwê rnôk ƀư samƀŭt hành chính, samƀŭt rhăch nău. Mpôl hên ntop kơl kônh wa ta lĕ rngôch ăp nău aơ, bah ndơ̆ samƀŭt rhăch nău tă bah rhăch nău nsum tât dŏng VNeID bah N’gâng kan Công an. Lơn lah đah kônh wa rnoi mpôl đêt, nău ƀư aơ dơi tâm rgop ƀa ƀơ, soih aih na nao, gay n’hŭch mông nar hăn nsong an kônh wa.

Hăn ndrel đah rmôt kơl kan, âk doanh nghiệp viễn thông têh rgop đŏng soan an ntrong leo “Ƀon lan nti mrô”. Ăp ntŭk nti dơi ntop kơl ndoh ndơ, trong lăp, phần mềm AI dơh, nơih dŏng, kơl nuĭh ƀon lan uănh joi n’hanh ƀư ngăch lơn. Wa Nguyễn Văn Thản, Groi Giám đốc VNPT Đắk Lắk, nkoch:

Mpôl hên lĕ đă cán bộ râng ăp rmôt công nghệ mrô ntŭk gŭ rêh ta phường, xă, thôn, ƀon, tổ dân phố. Ndrel n’gâng kan ƀon lan, mpôl hên ƀư ăp jrô nti nău blău dŏng mrô an cán bộ, công chức viên chức, gay ntĭm tay an nuĭh ƀon lan n’hanh doanh nghiệp. Nău rƀŏng gay ăp nuĭh ƀon lan dơi gĭt tât, wât n’hanh dŏng ăp trong mrô tâm nău rêh ăp nar.

Wa Bùi Thanh Toàn, Giám đốc N’gâng kan Khoa học n’hanh Công nghệ n’gor Đắk Lắk, an gĭt: 100 nar ntrong leo “Ƀon lan nti mrô” lah njoăt bôk năp gay rgâl mrô jêng bên ăp nar bah ăp nuĭh ƀon lan. Rnôk lĕ uănh joi, gĭt dŏng, gĭt tâm rgâl trực tuyến, ăp nău kơl, rhŏ an nău nsum mư ngăn ngên dơi tât đah kônh wa, gay mô an geh nuĭh ntlơi bah kơi.

Mpôl hên lĕ pă tĭng ăp rmôt nuĭh n’hanh mbơh ƀư nău kan 100 nar hô ngăn. Nău rƀŏng lah năp an nuĭh ƀon lan nău blău, nău gĭt bôk năp mpeh rgâl mrô, mô knŭng ta nkual nklang ma hôm rêh tât ƀon lan rnoi mpôl đêt nkual jru, ngai. Rnôl lĕ bên mbrơi mbrơi, nuĭh ƀon lan mbra gĭt kơt dŏng ăp trong mrô rhŏ an pah kan jan sa, tăch rgâl n’hanh ƀư tĭng rhŏ kan, samƀŭt hành chính công dơh lơn.

Bah ăp nar “djôt ty ntĭm kan” tât ton bah n’gâng kan n’hanh doanh nghiệp, ntrong leo “Ƀon lan nti mrô” dôl kơl công nghệ mô hôm lah nău mha đah ăp nuĭh. N’hanh jêh ăp nar, ta Đắk Lắk lŏ geh tay âk nuĭh jêng nuĭh ƀon lan mrô, nkra tay jêng du nău rêh jêng mrô lĕ rngôch, kon nuĭh uĕh n’hanh săk rnglăy. Aơ lah nkô̆ nău khlay gay n’gor jêng n’gâng kan mrô, nău rêh jêng mrô, wăng sa mrô.