Rnăk wâl yuh Ma Sỹ ta thôn Ka Rái 1, xă Ka Đơn, nkuăl Đơn Dương, n’gor Lâm Đồng, ngoăy tâm âk rnăk dơn geh nău uănh mĭn dŭt n’hâm tâm rơh Tết aơ. Nĕ lah jay mhe ƀư têh uĕh, du rnăk nâp nâl. Yuh rngot nkoch:

Lah mô geh nău bah n’gâng kan ƀon lan, gâp mô gĭt ndâk tât rnăk wâl mư geh du mlâm jay uĕh kơt nĕ gŭ. Lah uĕh đảng, ngih dak, lah uĕh kônh wa ƀon lan, knơm khân pơng ma mpôl hên geh jay mhe, mô hôm rvê đah ntŭk gŭ ntŭk sa tay. Mpôl hên geh nuih n’hâm gay nsrôih, hao tâm nău rêh, gay ăp kon geh du nău rêh rgŏ năp uĕh ang lơn.

Dơn ndơ têh gay ngăch wơt Tết, yuh H’Juet Niê ta xă Cư Pui, nkuăl Krông Bông, n’gor Dak Lak, răm rhơn. Yuh Juet nkoch, lĕ âk năm kon geh nău ji jêr bah, rnăk 4 nuĭh tâm mpet gŭ tâm jay sat, aƀaơ jay mhe le geh nuih n’hâm gay yuh rlet rlău jêr jŏt:

Năm aơ, rnăk wâl gâp geh jay mhe, mpôl hên dŭt uĕh lăng ngăn, rklaih ach o n’hanh đăp mpăn nău rêh tâm rgŏ năp.

 Tết Nguyên đán lĕ dŭt êp. Ndrel đah nău ndăn jêh jay mhe an ăp rnăk jêr jŏt sĭt jay gŭ, lam ăp n’gor Tây Nguyên, lĕ ƀư ăp nău kan mât uănh têt. Hang rbăn nklâm ndơ Tết lĕ dơi an tât ty kônh wa ta ăp ƀon lan. Bôl ndơ mô khlay âk yơn ăp nklâm ndơ tết lah nău njuăl an nău rŏng nuĭh, uănh mĭn, ntrŭt nsôr. Yuh H’Leon Kbuôr, rêh ta ƀon Ea Nao B, xă Ea Tu, nkual ƀon têh Buôn Ma Thuột, nkoch nău răm bah nơm rnôk dơi dơn ăp nklâm ndơ Tết geh âk nkô̆ khlay:

Năm aơ, rnăk wâl gâp geh Tết, lah uĕh ăp rmôt kan, lah uĕh Đảng n’hanh Ngih dak lĕ uănh tât mpôl hên. Mpôl hên ngăn ngên nkah gĭt n’hanh uĕh lăng rnôk dơi dơn nău kơl aơ.

Nền nhạc xuân vui

Tây Nguyên ta rnôk aơ dôl ntơm n’gŭr răm ăp bôk nău ƀư “Tết tâm rgum”. Ăp rmôt kan kơt Hội chữ thập đỏ, Mặt trận Tổ quốc, Liên đoàn Lao động, ndrel đah âk nuĭh, doanh nghiệp ndrel ty rgop soan gay ăp nuĭh ƀon lan, bôl lah ƀon lan rnoi mpôl đêt, nuĭh ach o mô dah rnăk jêr jŏt, geh ndơ wơt Tết tŏng ăp. Wa Trương Công Thái, Groi Kruanh UBND n’gor Dak Lak, nkoch:

Băng: Rnôk ăp Tết tât puh way dang nkao N’gor ủy, Hội đồng nhân dân, Ủy ban nhân dân. Ủy ban Mật trận Tổ quốc Việt Nam n’gor lĕ ntĭm rđău ăp rmôt kan đảng kơt ăp gưl n’gâng kan ƀon lan ndrel đah ăp nuĭh lŏng bôk tôr, ăp doanh nghiệp gŭ ta n’gor ƀư tĭng bôk nău kan rgŏ jă gay ƀư Tết tâm rgum, rhŏ an kônh wa ƀon lan wơt Tết hơm răm. Ndrel đah bôk nău kan jŭt ngih rông mpông sat ri nău an ăp ndơ an kônh wa nuĭh ƀon lan geh nău rêh jêr jŏt lah nău dŭt n’hâm khlay.

Tâm ăp nar dŭt năm aơ, rnôk nău Tết dôl êp tât, ăp nău nkoch mpeh ăp rnăk wâl ach o geh jay mhe, geh ndơ Tết tŏng ăp mô knŭng nsĭt tay nău răm an khân pơng ma hôm mpoh ang nău răm tâm nău rŏng nuĭh, an nău tâm rnglăp n’hanh nuih n’hâm kơl nuĭh. Nĕ lah nklâm ndơ nuih n’hâm dŭt khlây, gay yan puh năm aơ ngăn ngên lah yan bah nău tâm rŏng, tâm pă n’hanh mpŏng kâp./.