Ta rƀŭn nchră, ntoh măt ăp doanh nghiệp Việt Nam n’hanh Trung Quốc lĕ tâm nchră mpeh trong mkra hao jêng n’hanh tŏng ăp đăp mpăn, nâp nâl nău ƀư nkra njêng tâm năm tât. Tâm nĕ, ăp doanh nghiệp Việt Nam mpŏng ŭch dơi ntop kơl gĭt ngăch ăp nău kơl, quy chuẩn kỹ thuật, nău ntrŭnh mhe n’hanh rnoh di răk kloh uĕh đăp mpăn ndơ sông sa mhe bah Trung Quốc. Nkre geh trong mbơh ƀa ƀơ gay ngăch nkra di tuch tăm.

Mpeh đah Trung Quốc, âk doanh nghiệp an lah Gia Lai ŭch uănh khlay lơn tât nău đăp mpăn bah ntŭk tăch, uĕh kah tâm ban n’hanh dơi nkret njêng jru gay hao khlay. Wa Lư Lệ Phương, Giám đốc tăch rgâl Tập đoàn Ntuh kơl Vịnh Bắc Bộ (n’gor Quảng Tây, Trung Quốc), an gĭt:

Đah đoanh nghiệp Trung Quốc, dŭt uănh tât nkual nkra njêng n’hanh ndơ bah Việt Nam. Geh âk ndơ uĕh. Nar aơ, tât aơ tay, gâp ŭch mĭn joi tay nkual tuch tăm bah Việt Nam nu nău m’hâm mbơh ƀư, mât uănh mpeh trong tăch n’gluh. Lah ŭch hao jêng rnoh ndơ tăch n’gluh an Trung Quốc ri an geh groi nđôi, nkret njêng, tâl dŭng ndoh ndơ kloh na nê̆.

Ta rƀŭn nchră, ăp ding tâm ban ŭch âk mpeh nău an ndâk njêng ăp trong boăt nthoi na nê̆, n’hŭch nău ƀư ta n’gul, nkre ntrôl kan ndrel tâm ntil nău logistics. Wa Nguyễn Thị Diễm Hằng, Tổng Giám đốc Công ty Cổ phần Vinanutrifood Bình Định, an gĭt aƀaơ lĕ geh âk doanh nghiệp Việt Nam lăp rgum jru ntŭk tăch Trung Quốc n’hanh wât kloh ăp nău kơl geh tât. Aơ lah dơh têh gay hun hao ăp nkual tăm geh tâm di uĕh ta Gia Lai.

Mpôl hên lĕ dơi gĭt nău khlay ngăn lah nău kloh rah wah bah mât uănh nkual tăm an tât ngih măy nkre njêng tuch tăm. Mpôl hên kơt dŏng AI, ndơ̆ tâm dữ liệu bah ăp n’gâng tơm bâh Trung Quốc, ăp nău nchroh yan ơm, năm khay mpeh rnoh ndơ tâm rgop đah nkual tăm ta Việt Nam gay n’gluh an ăp ndơ di yan n’hanh di tŏng rnoh an ntŭk tăch.

Ta rƀŭn nchră, lĕ geh 7 samƀŭt djôt dơn kan ndrel dơi ký ton đah doanh nghiệp Gia lai n’hanh Doanh nghiệp Trung Quốc. Wa Nguyễn Tuấn Thanh, Groi Kruanh Rnâng kan UBND n’gor Gia Lai mĭn lah, n’gor dôl rgum lôch jêh lĕ rngôch ăp ndơ gay nta an dơh ngăn an doanh nghiệp, tâm nĕ geh ăp nuĭh ntuh kơl dak bah dih n’hanh doanh nghiệp Trung Quốc:

N’gor Gia Lai dŭt uănh khlay rgum jêh trong ngih wâl ntung trong ta lam n’gor, ntung trong ăp rkum công nghiệp, trong kan nkra rgâl samƀŭt hành chính mpeh ntuh kơl ndâk ƀư, soăy, hải quan. Tât đah Gia Lai, ăp doanh nghiệp, ăp nuĭh ntuh kơl mbra nta nơih gay ƀư tĭng nău nchrăp ƀư lôch jêh n’hanh hun hao nâp nâl.

Aƀaơ, Gia lai geh bơi 1 rkeh ha neh tuch tăm lŏ mir đah ăp nkual way tăm têh hvi. Tâm nĕ, cà phê lah tơm tăm khlay, đah rlău 107.000ha, rnoh ndơ ăp năm rlău 333.000 tấn. Ăp ntil tơm tăm kơt sầu riêng, tiêu, điều, cao su, prit, chanh rse, bum prŭm, rpŭng kai, mrăch... geh rnoh neh bah đêt rbăn tât rhiăng rbăn ha, tâm di ăp rnoh tâm di an tăch n’gluh.