Tât rnôk aơ, nuh srê ji ndul drjoh sŭr châu Phi lĕ ntoh luh ta âk xã, phường ta n’gor Đăk Lăk, an geh su pŭr rlău 1 rbăn mblâm bâh klâp ma 100 rnăk mât rong. Wa Đặng Thị Thủy, Groi Giám đốc ntŭk kan tuch tăm mât rong n’hanh ntŭk gŭ rêh n’gor Đăk Lăk an gĭt, nău mât njrăng nuh srê mô dơn geh nău khlay mât ueh ntŭk mât rong, mât đăp mpăn ueh ndơ sông sa ma hôm nha ntop ndâk nsơm rnoh dŏng ndơ sa đŏng.

“Aơ lah nău kan khlăy kơl an ƀon lan mât đăp mpăn mât rong, tâm ban kơt rnôk ntil ndơ geh ndŏ ta ntŭk tăch rgâl bâh ăp ntŭk kan nkhĭt roch. Aƀaơ, mpôl hên dôl n’hao nău kan mât njrăng mât ueh ndơ sông sa, gay ma mât đăp mpăn ndơ dŏng tât ti nuĭh dŏng geh đăp mpăn lơn, tâm di đah nău dơi geh. Aơ lah nău ueh, kơl an nuĭh dŏng ndơ đăp mpăn lơn”.

Ndrel đah mât njrăng ntŭk tăch rvăt bâh mpôl kan mât săm ndơ rong, mât đăp mpăn njrăng rdâng nuh srê ta ntŭk nkhĭt roch lĕ geh ƀư tĭng răng dăng, đah nău uănh nđôi na nê̆. Wa Phạm Quốc Thương- tơm ntŭk nkhĭt roch rgum ta thôn Tân Hiệp, phường Tân An, n’gor Đăk Lắk an gĭt, gay ma ntop njrăng rdâng nuh srê ji ndul djroh châu Phi, ntŭk kan lĕ geh mât uănh lơn tât tu tơm bâh sŭr.

“lĕ rngôch ăp rnoh sŭr ndŏ lăp dŏng ta ntŭk nkhĭt roch lĕ geh mât njrăng dŭt na nê̆. Sŭr rvăt bâh ăp ntŭk nkhĭt roch lĕ geh săm ƀŭt mbơh tơih ntŭk sŏk na nê̆, mô geh rvăt lêng lang, jêng lah mât đăp mpăn đah ntŭk tăch rgâl tât nuĭh dŏng, dŭt tâm di đah nău ntrŭnh kan na nê̆ bâh cán bộ thú y, jêng lah ntŭk kan bâh gâp đăp mpăn ngăn”.

Nuh srê ji ndul djroh sŭr châu Phi ntoh luh ta âk ntŭk tâm n’gor Gia Lai. Rlău ma ƀư khuch âk an nuĭh mât rong, nuh srê lĕ khuch âk tât nău kan tăch rgâl bâh ăp nuĭh tăch rvăt yor nuĭh ƀon lan mĭn mô ueh, mô đăp mpăn bâh poăch sŭr.

Wa Huỳnh Ngọc Diệp, kruanh ntŭk kan mât rong n’hanh thú y n’gor Gia Lai, an gĭt ntŭk kan lĕ n’hanh dôl tâm rgop na nê̆ đah ăp ntŭk kan gay ma ƀư tĭng ăp trong kan njrăng rdâng đah nuh srê răng dăng. Nkre lah, mpôl kan têh lĕ geh n’hao nău uănh njrăng, uănh nđôi na nê̆ ăp ntŭk nkhĭt roch n’hanh tăch rvăt.

 “Bâh nău gĭt na nê̆ mpôl kan nkhĭt roch sŭr ta ăp ntŭk nkhĭt roch rgum ta ntŭk rgĭ geh n’huch đah ăp khay ba năp. N’gâng kan way geh mbơh tơih n’hanh ntrŭt đă ƀon lan lah nuh srê ji ndul djroh sŭr châu phi mô geh ntiwp ta nuĭh jêng ƀon lan mô ir rvê, an geh săch ntŭk tăch knơm, đăp mpăn, ntŭk geh ntŭk kan thú y mât njrăng mbơh tơih đăp mpăn”.

Tĭng nău mbơh bâh n’gâng kan tuch tăm mât rong n’hanh ntŭk gŭ rêh, aƀaơ lam dak geh bơi tât 1 rbăn ntŭk geh srê ta 34 n’gor, nkuăl ƀon têh. Rlău 330 rbăn sŭr lĕ geh su jăng. Ta năp nău nuh srê ji ndul djroh châu phi ntoh luh âk ta lam dak Groi Thủ tướng Trần Hồng Hà mhe geh pah kan đah n’gâng kan tuch tăm mât rong n’hanh ntŭk gŭ rêh, ăp n’gâng kan ntŭk kan geh tât mpeh nău nuh srê n’hanh mbơh đă trong kan an tâm di, nău kan gay ma njrăng rdâng nuh srê, mât đăp mpăn rnoh pă poăch sŭr an ăp khay dŭt năm 2025. Groi Thủ tướng Trần Hồng Hà ntĭm đă n’gâng kan tuch tăm n’hanh ntŭk gŭ rêh ngăch ndăn uănh năl lĕ rngôch nău ntrŭnh aƀaơ mpeh njrăng, rdâng, bah nuh srê, nău dơi mbơh nuh srê an ăp gưl xã n’gor, trung ương, ndŏ an chính phủ ntrŭnh sƀ tĭng ăp nău kan rhoăt gleh gay ma rgâl nkra, ntop kan, nău kơl kan, nău kan an tâm di đah nău kan ta ntŭk 2 gưl.