Geh ƀư ăp mpâr ih ta prêh ta chor jay ntŭk dơi geh đâng lĕ măt nar nchrat, lah nău dơh saơ tâm nău ƀư poăch ndrôk ih du nar bâh ntŭk kan Tuấn Hậu, nkuăl têh Phú Túc, nkuăl Krông Pa. Ăp rlak poăch ndrôk têh du mpang ti geh săch ntŭk poăch i kah rêh, geh rse poăch jong, mô geh ngi, lôch mpli đah ăp ntil ndơ ƀô kah klâp ma 60 mnĭt kơt boh, jăm, tỏi, mbrăch n’hanh mblăng, mbra geh ih ta ndrơng bâh 3-4 mông. Wa Trần Quang Tuấn - tơm ntŭk ƀư poăch ndrôk ih du nar Tuấn Hậu an git, ăp nar duh ueh, wa geh ih 2 rơh, bâh 9 mông tât 12 mông nar n’hanh bâh 12 mông tât 3 mông kêng măng. Wa Tuần an gĭt, bâh du ndơ sa way sa bâh ƀon lan rnoi Ja Rai ta ntŭk, poăch ndrôk ih du nar Krông Pa aƀaơ lĕ geh tăch âk ta ntŭk tăch rgâl.

 “Ntil ndơ aơ geh ntơm bâh ndơ sa way ơm bâh nuĭh Jarai, bâh nĕ ƀon lan sŏk nĕ gay ma ƀư ndơ sa an năch rnôk kăl e nơh. Êng mpeh ndơ mpli pot an ƀô kah rĭ hên  mpli pot tĭng nău ŭch sa bâh rnăk nơm dơm, mô geh nsum kơt ta ntŭk tăch rgâl, geh êng kơt nĕ. Ăp rơh geh ƀư rơh tâm mbơh mpeh ăp ntil ndơ bâh nuĭh ƀon lan ƀư rĭ rnăk vâl geh tât râng. Geh rơh nkhêp tâm mâp tâm nđŭr tăch ndơ tât rĭ gâp mbra nsrôih tât râng gay ma mbơh tơih ăp ntil ndơ aơ tât nuĭh dŏng ndơ geh dŏng ueh lơn”.

Ndrel đah ntŭk kan Tuấn Hậu, âk rnăk ƀon lan ta nkuăl Krông Pa lĕ geh tât râng ƀư poăch ndrôk ih du nar, rdâk njêng geh nău ntơ geh nău knơm n’hanh geh kơp dơn lah ntil ndơ OCOP bâh ta ntŭk. Wa Hồ Thị Mười- Tơm ntŭk kan Mười Đức nkuăl têh Phú Túc, nkuăl Krông Pa lĕ tă geh gĭt 30 năm ƀư poăch ndrôk ih du nar. Tĭng nău mbơh bâh wa Mười, ăp nar, ntŭk kan bâh wa ƀư geh klâp ma 50kg poăch ndrôk rêh. Ta rnôk dăch tết geh nar ƀư bâh 5 tât 7 tạ poăch ndrôk gay ma pă an ăp ntŭk tăch nđơn tay, nsĭt nău geh âk đŏng.

 “Aƀaơ ndrel rĭ rnăk vâl lĕ dôl geh 3 sào nkuăl pă an n’hanh tât tay nkuăl geh dăn n’hao tay 4 sào, ntil ndơ bâh gâp geh rlet rlău ăp ntŭk ueh lơn, gay a ndơ̆ an ntŭk tăch rgâl n’hanh gâp lĕ dơi geh 4 sào gay ma tĭng ntŭk tăch rgâl ta lam dak. Yor săk soan bâh nuĭh dŏng ndơ  gâp lĕ mpŏng tât lah nău mât đăp mpăn ndơ sông sa n’hanh ăp ntil ndơ geh an lor mât ueh”.

Yuh Hoàng Thị Minh Châu, gŭ ta nkuăl têh Phú Cần, nkuăl Krông Pa lah nuĭh ƀa ƀơ geh rvăt poăch ndrôk ih du nar gay ma pă an rnăk vâl ta ƀon ăp tơ̆ tết.

 “Gâp dŭt ŭch sa poăch ndrôk ih du nar ta Krông Pa, Gia Lai, yor ndrôk ta aơ geh kah êng, poăch rvên, geh ih đah duh nar n’heng, sa geh nău kah êng đŏng.  Ăp năm dăch tết lah gâp way rvăt bar pe kg sĭt pă an nuĭh bên, u che, mê̆ bơ̆, yuh nô băl mpôl”.

Lam nkuăl Krông Pa geh klâp ma 30 ntŭk kan ƀư poăch ndrôk ih du nar. Tâm lĕ rnoh 29 ntil ndơ Ocop bâh nkuăl, geh 20 ntil ndơ ƀư bâh poăch ndrôk geh poăch ndrôk xêk hăch, poăch ndrôk kro tĭng rlak, nting rpaih ndrôk ih du nar, ndrôk pâr nă ŭnh...Wa Nguyễn Đình Nhung - kruanh hội nông dân nkuăl Krông Pa an git: Gay ma dơi kơl an ăp nuĭh ƀon lan hun hao pơk hvi nău pah kan n’hanh ntŭk tăch rgâl ta hội nông dân nkuăl tâm rgop ndrel đah ăp n’gâng kan, ntŭk kan gay ma ntrôl nău mbơh tơih, ntĭm nti nuĭh ƀon lan nsrôih tât râng bôk nău kan Ocop nta nău dơh nơih gay ma ăp ntŭk leo kan geh mbơh tơih ntil ndơ, pơk hvi ntŭk tăch rgâl.

 “Ăp năm rĭ Hội nông dân nkăl hôm nha geh nău nchrăp rdâk njêng ăp bôk nău kan, ngăn lah tâm nău kan ma ndơ̆ ăp ntil ndơ hăn tât râng ăp rơh tăch ndơ geh ƀư tuch tăm yor hội nông dân n’gor leo ƀư, lôch nĕ ăp nkaưl êng geh ƀư kơt nĕ đŏng. Ntĭm đă hội nông dân ăp ntŭk kan ba dâng leo ƀư ăp rnăk pah kan tăch rgâl blău, ngăn lah ăp rnăk ndơ geh ndơ OCOP, nti;l ndơ tăch rgâl ta điện tử”.

Đah lĕ rnoh ndrôk rlău 64 rbăn mblâm, tâm nĕ dŭt âk lah ntil ndrôk jê̆, krông Pa dôl n’hao lĕ ueh nău dơi mpeh rnoh ndơ geh ƀư ueh. Đah nău tâm rgop kan nău nău dơh nơih ơm geh, mpeh kĩ thuật way geh ƀư êng n’hanh ăp nău kơl an lĕ kơl n’gâng kan ƀư poăch ndrôk ih du nar jêng nău kan nsĭt tay nău wăng sa âk an nuĭh ƀon lan ta ntŭk.

Bah kơi aơ lah rơh tâm ôp bah Phóng viên nkô̆ way nkoch đah wa Võ Ngọc Châu, Kruanh Jrô kan tuch tăm n’hanh hun hao ƀon lan nkuâl Krông Pa gay gĭt dơi săk geh, trong rƀŏng hun hao puăch ndrôk du nar ih ta nkuâl let năp tay. 

-Dăn lah uĕh wa Võ Ngọc Châu, Kruanh Jrô kan tuch tăm n’hanh hun hao ƀon lan nkuâl Krông Pa hŏ râng rơh tâm ôp nar aơ. May mbra an gĭt lam lĕ rngôch mpeh nău ƀư puăch ndrôk du nar ih ta nkuâl he mêh wa?

-Wa Võ Ngọc Châu: Puăch ndrôk du nar ih Krông Pa lah ndơ kah ntoh lư bah nkuâl Krông Pa. Ndơ ƀư dơi rdâk njêng ta săk ntơ lư bah ndrôk Krông Pa, Gia Lai. Dơi Cục Sở hữu trí tuệ kơp dơn ta mbrô 1319237 nar 18/3/2022, ndơ ntoh lư bah săk kah puăch ndrôk nsing ta lĕ rngôch âk 64 rbăn mblâm, âk dâk bôk năp bah n’gor Gia Lai, lơn âk lah ndrôk ntil ta ntŭk, mât rong tĭng trong du n’gul n’gluh chiăp ta nkuâl jêng hŏ geh săk lư. Nơm geh puăch ndrôk ƀô kah, ndrel đah nê trôk nar duh, sơh kro ntĭt êng bah nkual Krông Pa nar lơn ma nta trong dơh gay puăch ndrôk geh rnoh kah njŭng n’hanh ƀô kah ntĭt êng ma mô ntŭk êng dơi geh. Aƀaơ, ta nkuâl Krông Pa geh 30 ntil ndơ ƀư luh bah puăch ndrôk, lơn lah tâm nê geh 2 ntil ndơ geh ƀư OCOP dơi kơp dơn  4 sao bah n’gor. Yor kơt nê̆ aơ lah nău nsing nơm an nău hun hao n’hanh nău nsing nơm bah n’gâng kan ta nkuâl Krông Pa.

-Ndrĭ tĭng may moh ndơ ƀư jêng nău kah mha êng bah puăch ndrôk du nar ih Krông Pa mêh wa?

-Wa Nguyễn Ngọc Châu: Nău dơh uĕh jêng geh nău kah mha êng bah puăch ndrôk du nar ih Krông Pa lah ƀô kah bah puăch ndrôk du nar ih Krông Pa dơi rgum jêng bah âk ntil ndơ ntĭt êng. Lor bôk năp, tơm puăch ndrôk ƀư lah lơn  âk bah tơm ndrôk ntil jê̆ ƀon tơm ta ntŭk dơi mât chiăp ta ndrĭch ja hon êng bah nkual, ntŭk geh trôk nar duh sơh n’hanh kro phang mha êng. Nău dja kơl an ndrôk rơ̆ jêng âk n’hanh puăch mblay chăt, ƀô kah. Rnôk ƀư puăch ndrôk du nar ih lah ndơ n’glêh an dơi ƀư njêng tĭng trong way ơm lah ih 1 nar, kân tay ƀô kah ơm geh n’hanh rnoh rêh kah bah puăch ndrôk. Trong ƀư dja kơl puăch ndrôk ih sơh, nha hôm mât mham rêh, wên, n’hŭm ƀô kah ntĭt êng bah puăch ndrôk du nar ih rđĭl đah ăp ntŭk êng ƀa ƀă. Rlău ma nê hôm ntop geh tay văn hóa rgop njêng ndơ ntop êng ƀa ƀă đah puăch ndrôk du nar ih Krông Pa, nsĭt tay ndơ sa kah mha êng an nuĭh  rlong sa. Ăp ndơ dja hŏ rgop njêng du ntil puăch ndrôk n’hŭm ƀô, lơn lah lăp măt n’hanh ntoh lư tâm n’hanh bah dih n’gor. 

-Ndrĭ n’gâng kan ta ntŭk n’hanh n’gâng kan dơi kan mbra kơl nkuâl hun hao puăch ndrôk du nar ih tâm let năp tay mhâm mêh wa? 

-Wa Nguyễn Ngọc Châu: Ăp năm, UBND nkuâl rđău đă ăp n’gâng kan n’hanh ăp nhih pah kan dơi kan ăp hội chợ ndơ tuch tăm mât rong ta nkuâl nkơnh n’hơ ndơ geh ƀư bah puăch ndrôk du nar ih. Ăp năm, nkuâl đă ăp tơm nuĭh geh ndơ ƀư OCOP hăn râng nkơnh n’hơ săk ntơ lư ta n’gor, bah dih n’gor n’hanh ăp n’gor nkual ƀon têh êng ƀa ƀă. Nău ŭch bah nău kan dja gay nkoch mbơh săk ntơ lư n’hanh nkơnh n’hơ ndơ geh ƀư bah puăch ndrôk 1 nar ih Krông Pa tât đah ăp ntŭk êng ƀa ƀă. Gay hun hao jŏ jong, nkuâl geh trong rƀŏng ntop kơl kỹ thuật ih pâr têh uĕh mhe gay n’hao rnoh khlay săk ntơ lư, pơk hvi ntŭk tăch rgâl n’hanh hun hao tâm nkrêp rêng kan rnoh khlay ntơm bah ƀư njêng tât tăch rgâl. Puăch ndrôk du nar ih Krông Pa mô dơn lah ndơ geh ƀư kah khlay ta ntŭk ma hôm lah suan ntrôl khlay ntrŭt ntrôl hun hao wăng sa n’hanh nkơnh n’hơ rup gui bah nkuâl.

-Ơ dăn lah uĕh wa!