Đah nau lêt rgănh yor mô geh bĭch, geh nsum ma nau ji nuih, wa Nguyễn Văn Tấn (thôn 8, xã Ia Tô, nkuăl Ia Grai, n’gor Gia Lai) mbơh, măng naơ nơh rnăk wa geh bu lăp ntŭng tât 2 tŏ. Nglan ih geh n’gar loih, ngih êp ƀon lan yơn lah phung ntŭng kŏ lăp gay ma ntŭng cà phê tâm nglan ih. Rnăk wa geh 3 ha cà phê, rnôk aơ hŏ geh bu ntŭng rlau n’gul, đah 25 tấn dôl ih tâm tâm nglan. Tĭng wa Tấn, rnoh cà phê năm aơ khlay, du ƀao geh rnoh ma rkeh prăk ri ma ăp nŭih bu ntŭng lăp janh kơt nê:

‘Rnôk aơ du ƀao cà phê rih rlau du rkeh prăk, hôm ƀao cà phê rnglay rlau ma jêt rkeh đŏng ri ma phung ntŭng mô geh mâp janh ngăn kơt năm aơ ôh, măng ri lăp tâm ngar ngih, nglan ih. Mhe măng naơ nơh, 2 tŏ ri nơm hăn mprơh phung ntŭng. Tâm mir ri khân păng n’gih n’ăp ma n’ging, roh play ndrih tâm ăp trong jêh ri geh bu leo ntŭng lĕ đŏng”.

Ndrel ma Gia Lai, ăp n’gor bah Tây Nguyên dôl tâm yan klih cag phê. Rhơn ngăn cà phê khlay (ntơm 120-130 rbăn/kg cà phê rnglay) yơn kônh wa âk ntŭk kŏ rvê bu ntŭng đŏng. Wa Nguyễn Văn Quý, tâm Thôn Thanh Lâm, xã Đức Minh, nkuăl Dak Mil, n’gor Dak Nông mbơh, du đê̆ bu ntŭng geh lĕ ƀư kônh wa rvê mô hăk bĭch tâm yan klih aơ:

“Năm aơ ri rnoh cà phê khlay, nŭih ƀon lan ta aơ geh du đê̆ ntŭk bu ntŭng hôm. Kŏ ŭch ntŭk mât njrăng kơt âk năm bah năp nê, ƀư ân ueh nau kan bah nơm tâm xã Đức Minh”.

Ndrel ma mir cà phê, nglan ih bah ƀon lan, ăp nŭih ntŭng kŏ dôl rƀŏng tâm ntŭk nông trường, công ty cà phê, ăp ntŭk rgum âk cà phê jêh geh klih nsĭt. Wa Đỗ Giao Hưởng, Kruanh, nkre lah Giám đốc Công ty cà phê Ia Blan, nkuăl Ia Grai, n’gor Gia lai mbơh, nau ntŭng cà phê năm aơ geh ak, janh lơn ƀư ân công ty dŭt n’hâm rgănh gay ma rdâng. Rnôk aơ, n’ăp ma rđau kan, nŭih pah kan bah lam công ty rgum gay ma mât njrăng tâm mir cà phê ntŭk prăp tâm âk măng:

‘Kơt tâm măng naơ, geh 4 nŭih ntơm 11-12h măng lăp ngăn tâm ntŭk nglah ih bah công ty, lap lah geh nŭih mât njrăng ri năn saơ ơm ri ăp nŭih nê păng nchuăt du. Năm aơ cà phê khlay, khlay ngăn kơp ntơm sa ơm ri ma cag phê jêng âk đŏng ƀư bu ntŭng mô dơi der. Ntơm bah rnôk yan klih ri hên hŏ tâm gop nsum, jă Công an xã ndrel đă n’gâng kan nkuăl kơl an ân nau mât njrăng rnôk klih oh”.

Mât mir tăm, drăp ndơ ân ƀon lan tâm yan klih cà phê lah nsum, cà phê lah êng geh công an ăp n’gor Tây Nguyên ƀư mro. Yơn lah, nau ntŭng tâm yan klih cà phê năm aơ jêr jŏt lơn, ndri ma, công an ăp nkuăl hŏ nchrăp nâp lơn rmôt kan, tâm rgop nsum ma ƀon lan ndrel rmôt mât đăp mpăn hăn mât njrăng, ngăn lah tâm yan cà phê dŭm âk. Trung tá Đồng Thị Lâm, Kruanh Công an xã Đức Minh, nkuăl Dak Mil, n’gor Dak Nông mbơh:

‘Đah nau mât cà phê ri ăp năm công an xã râng kơl mbơh nchră ƀư kan. Yơn lan, nsing tâm nau ngăn bah năm aơ, êng nau pă 6 rmôt tâm mir tĭng ntŭk, du rmôt mât njrăng bah công an xã ri hôm rnoh ăp ntŭk ƀư nau kan kŏ geh n’hao âk đŏng.

Tâm nkuăl Ia Grai, n’gor Gia Lai, Trung tá Trương Ngọc Ánh-Kruanh rmôt Kơl mbơh nchră nau Công an nkuăl mbơh, nau kan mât mir tơm bah ƀon lan geh ƀư tĭng âk kơn:

‘Đah nau kan “Njrăng rdâng tă bah tâm dâng, njrăng tă bah nkuăl”, phung hên ntrŭnh ƀư nau kan mêt uănh tĭng 3 kơn: Kơn tâm trôm ngăn lah mât đăp mpăn nâp nâl tâm dâng, kơn tal 2 lah công an xã, ndrel kơn bah dih ngăn lah công an nkuăl. Êp nê, phung hên tâm rgop mêt uănh, nkân njrăng, nkre hăn uănh ƀư nau kan bah nơm nkre mât đăp mpăn ân ăp mir tơm bah kônh wa”./.