Ta rgum nchră, âk đại biểu lah rjăp, hun hao lŏ mir kloh uĕh mô knŭng trong khlay ta năp rgâl trôk nar mih sial, ma hôm dơi n’hao prêh khlay ndơ lŏ mir n’hanh mât njrăng ntŭk ntô. Đah n’gor geh rlău 1,36 ha ha neh n’hanh âk nău dơh tuch tăm kơt Đắk Lắk, tuch tăm kloh, uĕh, tâm pleh lơ geh nkô̆ khlay. Tiến sĩ Trần Ngọc Thanh-Viện trưởng Viện Nông nghiệp Phát triển Nông thôn an lah, tuch tăm kloh, uĕh n’hanh săk rnglăy mô mbơh rblang lam hvi, du gưl yor ăp mĭn njêng aƀaơ hôm e geh nău têh, mô na nê̆ gay ƀon lan kơt dŏng dâl.

Ăp mĭn njêng mpeh lŏ mir hữu cơ, lŏ mir tâm pleh bah sa ơm mhe rlu ta ăp nchrŏng nsum. Nău nuĭh ƀon lan ŭch ntrong na nê̆ gay kơt dŏng tâm hợp tác xã n’hanh nkra njêng na nê̆. Neh ntu ri geh, yơn trong dŏng phân poh mô kloh, jêng tât phân tih ntil, tih yan, ƀư mpŭng lĭr. Dŭt ŭch ăp nău kơl ơm rgâl jêng ntrong ƀư na nê̆, dơh kơt dŏng.

Tă bah na nê̆ nkra njêng, wa Trần Thanh Thoảng, du hê nuĭh ƀon lan kan lŏ mir nkoch, gay ngăn ngên dơi geh tuch tăm kloh, uĕh... ngih pah kan mât uănh an n’hao uănh nđôi uĕh tam phân poh dak si lŏ mir, lơn lah phân poh n’hanh dak si mpa rong tơm tăm.

Ngih dak an groi nđôi rjăp ăp ntil phân, dak si mpa rong tơm tăm n’hanh rmal rjăp ntŭk tăch ndơ rlăm, mô uĕh tam. Nuĭh ƀon lan kan lŏ mir rnôk rwăt ndơ an tŏng ăp di uĕh tam, gay rnôk ndơ̆ an nkra njêng nsĭt tay săk rnglăy wăng sa ngăn ngên an tơm tăm.

Tâm ban ŭch nău rgop an lah, an geh nău hăn ndrel dăch dêh bah ngih pah kan mât uănh tâm nău uănh nđôi bôk lăp phân poh, dak si tơm tăm mpa rong, Groi cục trưởng Cục Tuch tăm n’hanh Dak si mpa rong tơm tăm Nguyễn Quốc Mạnh an gĭt, aƀaơ Cục lĕ pă gưl 22 tâm rnoh 59 samƀŭt sĭt an ƀon lan, geh n’ăp nău ntrŭnh mpeh nkra njêng phân poh n’hanh tăch n’gluh. Ăp ntŭk an ơm uănh joi n’hanh mbơh ƀư:

Tâm rnôk ƀư tĭng ăp samƀŭt hành chính geh tât tuch tăm n’hanh dak si mpa rong tơm tăm, lah N’gâng kan Tuch tăm mât rong n’hanh ntŭk ntô gŭ âm n’gor Đắk Lắk mâp jêr jŏt, an mbơh dâl đah N’gâng kan n’hanh Cục gay mpôl hên nchrăp đă nuĭh kan wât ngăn ntop kơl, mkra uĕh lĕ rngôch ăp samƀŭt lĕ pă gưl.

Geh tât nău nkra njêng lŏ mir nâp nâl đŏng, Ủy ban khoa học công nghệ n’hanh ntŭk ntô gŭ âm bah Quốc hội tâm rgop đah N’gâng kan tuch tăm mât rong n’hanh Ntŭk ntô gŭ âm ƀư rgum nchră “hun hao lŏ mir nâp nâl hăn ndrel đah mât njrăng ntŭk ntô gŭ âm”. Ta rgum nchră, ăp đại biểu năl lah: tâm rnôk rgâl trôk nar mih sial nar lơ geh jêr jŏt, ntŭk ntô bri dak n’hanh âk ntil sinh học dôl hŭch roh hô, n’hôl ƀô ntŭk ntô gŭ âm thôn ƀon n’hanh nkual nkra njêng lŏ mir dôl hao lah ăp ntŭl rlong đă nău kan lŏ mir dak he an rgâl ntrong hun hao bah joi ƀư âk an hun hao tâm di nâp nâl, bah uănh khlay rnoh geh an uănh khlay uĕh kah, săk rnglăy n’hanh dăch uĕh đah ntŭk ntô gŭ âm. Hun hao tuch tăm nâp nâl mô knŭng lah nău đă khlay ngăn ngên ma hôm lĕ đah nău kan bah Việt Nam tâm nău ƀư tâm ton lam ntŭr neh.

Ta rgum nchră, Groi Kruanh Quốc hội Lê Minh Hoàn lah rjăp: Lŏ mir tâm pleh mô knŭng ntơm bah gưl prêh ma bah n’gâng tơm. Ŭch hun hao nâp nâl mô lah ntơm bah ăp nău jêt ngăn, mô dơi kâp jêh trong ƀư, tơm prăk tŏng ăp mư ntơm lăp kan, an ntơm bah tĭng rnăk ƀon lan dơi ƀư nău jêt ngăn, tĭng cán bộ ntrŭt nsôr kan lŏ mir ngơi đah nău ngơi dơh wât ngăn, tĭng ntŭk mĭn njêng trong mkra ngăn ngên. Êp tât Quốc hội kơl an nkra rgâl tay, ntop ăp luật geh tât gay dôh rklaih mpêr n’gang, ntop kơl ntuh kơl kloh uĕh n’hanh n’hao groi nđôi ƀư ngăn, đăp mpăn jâng lŏ mir Việt Nam mô knŭng dơi geh nău rƀŏng hao jêng ma hôm rgop ƀư tĭng trong uănh hun hao neh dak tât năm 2045./.