Long rơchoâ têa Ia Mơr ai tâi tâng kơlo liăn pro vâ chê 3.000 rơtal liăn, têa vâ chê 180 rơtuh m3, châ kơchuâ pro vâ mơ’no têa tôh ăm dâng 12.500ha tơnêi pêt tơmeăm ƀă têa ôu kâ hum roh ăm dâng 50.000 ngế a 2 to kong pơlê Gia Lai ƀă Dak Lak. Cheăm tơkăng kong Ia Rvê, kong pơlê Dak Lak hiăng lăm ngăn dâng 1.100 ha a mâu thôn 6, 7, 8, 9 ƀă 11 vâ pâ thế po rơdâ kơpong tôh hneăng má 2 dêi tơdroăng tơkêa long rơchoâ têa Ia Mơr.

Ing séa ngăn kố, pôa Lương Nguyễn Minh Triết, Kăn pơkuâ ngăn Đảng Dak Lak tối nhên, ‘no liăn pro rơchoâ long têa a kơpong tơkăng kong ai pơxúa kal khât tung mơnhông cheăng kâ, kơdroh kơtiê krá ton, tơniăn ăm kuăn pơlê rêh ối ƀă ‘mâi mơnhông tơdroăng gâk kring pơla pơla cheăm.

Xua mê, mâu khu râ, kơvâ cheăng ki ai tơdjâk kal tơrŭm ƀă kơ koan Tơnêi têa chêh pro túa pơkâ ‘no liăn pro hno long têa ăm 1.100 ha hiăng lăm ngăn, pêi pro tơdrăng, mâu tơdroăng tơkêa bro ki ê. ‘Na ki ton troh tá ah, pơkâ pro long rơchoâ têa athế tơmiât nhên tơdroăng púi vâ dêi tá 12 to thôn tung cheăm.