Tíu tiâ mơnhên cho tíu ki kuăn pơlê pêi chiâk deăng, khu pêi cheăng tơrŭm, khu mơdró kâ ƀă mâu khu ki pêt mơjiâng kế tơmeăm kô châ tơpui tơno, châ 'nâi mâu tơdroăng ki rơkê plĕng 'na kih thuât, kŏng ngê̆ ƀă troăng hơlâ pơ'lêh kơxô̆. Tơdroăng tiâ mơnhên tơkŭm tung mâu tơdroăng ki kal tung pêi chiâk deăng môi tiah kih thuât pêt, hbrâ mơdât pơreăng, kơxô̆ ki chêh 'măn tung kơmăi, tí tăng xiâm kối, tơdjêp ƀă kơchơ mơdró ƀă tê kế tơmeăm pêi lo ing chiâk deăng. Pôa Nguyễn Công Vương, teăng mâ môi khu mơdró kâ veăng tung tơdroăng kố, tối ăm 'nâi, tơdroăng ki djâ khu mơdró kâ kŏng ngê̆ troh achê tâ ƀă mơngế ki mơjiâng pro kô pro tơ'lêi hlâu vâ mâu troăng hơlâ ki nếo châ séa ngăn ƀă tơdroăng ki xúa tơtro ƀă tơdroăng ki ai khât.

“Khu mơdró kâ kô rơtế ƀă Tíu xiâm Hnê mơhnhôk pêi chiâk tơbleăng pêi mâu túa pơkâ ứng dụng pêi chiâk deăng kong ngê̆ chal nếo tung tơdroăng pêi. Ing mâu túa pơkâ pêi ai tơdroăng tơrŭm pơla khu mơdró kâ ƀă Tíu xiâm Hnê mơhnhôk pêi chiâk, pêi cheăng ư̆ng yŭng kong ngê̆ chal nếo kô châ tơdjâk ƀă prôk troh tơdroăng mơjiâng pro rĕng tâ”.

Rơtế ƀă Tíu tiâ mơnhên, 4 Tôh tiâ mơnhên kih thuât ƀă tơdroăng mơhnhôk pêi chiâk deăng châ mơjiâng, tơmiât troh chiâng khu ki tŏng gum rơkê, tơdah xo tơdroăng kal vâ ing tíu pêi cheăng ƀă tơdjêp kuăn pơlê pêi chiâk deăng, khu pêi cheăng tơrŭm, khu tê mơdró ƀă mâu troăng hơlâ kih thuât, kŏng ngê̆ chal nếo.

Jâ Đặng Thị Thủy, Phŏ pơkuâ Khu ngăn chiâk deăng ƀă Hyôh kong prâi kong pơlê Dak Lak tối tiah kố, tơdroăng ki mơjiâng Tíu tiâ mơnhên ƀă mâu Tôh tiâ mơnhên kô pro tơ'nôm môi troăng tơdjêp péa pâ pơla kơ koan hnê mơhnhôk pêi chiâk ƀă mơngế ki pêi chiâk; ing mê teăm châ 'nâi mâu tơdroăng ki xơpá, tơdroăng ki rơhêng vâ khât ƀă hnê mơhno, tŏng gum. Jâ Thủy tối rơdêi, tơdroăng hnê mơhnhôk pêi chiâk nôkố ôh tá xê to pơtê a tơdroăng ki hnê kih thuât mê kal tơrŭm ƀă kŏng ngê̆, kơchơ mơdró ƀă tơkŭm pêi chiâk.

“Pơkâ pêi dêi ngin cho rơhêng vâ Tíu tiâ mơnhên kố chiâng môi tíu ki hmâ ăm kuăn pơlê pêi chiâk, khu mơdró kâ ƀă khu pêi cheăng; gum kuăn pơlê pêi chiâk rĕng châ xúa tâ mâu khoa hok kih thuât, tơdrêng amê hlối châ tơdjêp ƀă kơchơ tê mơdró. Ôh tá xê to hnê tối ‘na kih thuât môi tiah hdrối nah, kố kô cho tíu tơdjêp pơla 4 khu, tơleăng mơnhên mâu tơdroăng ki trâm khât sap ing tơdroăng púi rơhêng vâ pêi cheăng kâ, ing mê mơjiâng mâu tíu tơrŭm mơjiâng pro, ƀă pơtối tơdjâk, po rơdâ mâu túa pơkâ pêi”.