1 – Hop akŏm bơngai tang măt jâ̆p teh đak 'măng mă 13 kơ Đảng đei jơnei keh kong “'lơ̆ng rŏ"

Ƀok Tổng Ƀĭ thư Nguyễn Phú Trọng xơkơ̆t: “Hop akŏm bơngai tang măt jâ̆p teh đak 'măng mă 13 kơ Đảng bơ̆n hlôi đei jơnei keh kong 'lơ̆ng rŏ!”. Hop akŏm tơlĕch 6 xơnong jang tơm păng 3 tơdrong jang kăp gĭt; pơkăp trong jang kơ kăch mạng teh đak bơ̆n lơ̆m 5 xơnăm, noh jing truh xơnăm 2025, Việt Nam jing teh đak tŏk bŏk oei hơtŏk tơ iung, jang kiơ̆ kŏng ngĭp 'nao rơgei đei iŏk yua hloh kơ tơdrong kơđeh, tơlĕch xơnong jang ăn xơnăm 2030, tơbăt 100 xơnăm tơ iung pơjing Đảng, teh đak bơ̆n jing teh đak hơtŏk tơ iung, pơm jang kiơ̆ trong 'nao, đei iŏk yua brăm ƀiơ̆ păng pơkăp truh xơnăm 2045, tơbăt 100 xơnăm tơ iung pơjing teh đak, Việt Nam jing teh đak hơtŏk tơ iung, đei iŏk yua kơjung.  

Hop akŏm xơkơ̆t: “Teh đak hlôi đei jơnei dôm tơdrong tih tên, kăp gĭt kơ hnưr erih, hơtŏk tơ iung pran, tôm tơdrong pơtêng hăm dôm xơnăm adrol kơ noh. Teh đak bơ̆n tam mă lai yơ đei mŭk drăm, jơhngơ̆m pran, anih dơ̆ng păng đon lui lơ̆m apŭng plenh teh nhen dang ei”.

2. ‘Măng pôk rơ̆ih kơdră tang măt Kuô̆k hô̆i jăl XV păng kơdră tang măt Jơnŭm vei lăng kon pơlei jăl jang 2021 – 2026 jơnei keh kong lơ̆m khei ‘năr đei jĭ hơbŭh pơrăm hơlơ̆k dơ̆ng

VOV4.Bahnar - Năr 23/5/2021, vă jê̆ 70 trĭu ‘nu bơngai tăh hla hlôi năm tăh hla (jơnei 99,6% bơngai tăh hla năm tăh hla) pôk rơ̆ih kơdră tang măt Kuô̆k hô̆i jăl XV păng Jơnŭm vei lăng kon pơlei jăl jang 2021-2026, lơ găh măt bơngai năm tăh hla pơtêng hăm ‘măng tăh hla hơdrol.

‘Măng pôk rơ̆ih đei pơgơ̆r hơtŏ hơnơ̆ng, ƀlep khôi luơ̆t, sơđơ̆ng ‘lơ̆ng hơ iă, pơkom păng tơpă jing Năr lêh tĭh kơ pơ đĭ kon pơlei. ‘Măng pôk rơ̆ih hlôi pơm ăn đei tơdrong hơ iă, lơ tơdrong hơ iă “ ‘măng mă blŭng” nhen: ‘măng mă blŭng pơgơ̆r pôk rơ̆ih jơnei, sơđơ̆ng lơ̆m khei ‘năr đei jĭ hơbŭh Covid-19 pơrăm; ‘măng mă blŭng lơ̆m prăt 76 sơnăm kơ Kuô̆k hô̆i đei ƀar ‘nu bơngai tang măt ăn rim hơdrung kơ toei măt bơngai ‘nŏh hơdrung Lự hăm hơdrung Brâu vang mơ̆t jang lơ̆m Kuô̆k hô̆i.

3 – Hơtŏk pran dôm tơdrong jang tơbôl, hơtŏk anih dơ̆ng kơ teh đak

Xơnăm 2021, mă pơrang jĭ Covid 19 hơbuh hli hlơt lơ̆m kơpal teh, chŏng mă dôm tơdrong jang tơbôl lơ teh đak păng 2 teh đak kơ Việt Nam duh đei tơlĕch jang hơnơ̆ng. Hơdăh noh tơdrong mă ƀok Tổng Ƀĭ thư Nguyễn Phú Trọng pơma điê̆n thoăi hăm kơdră kơ dôm teh đak, xơng lơ khul tơmoi đơ̆ng teh đak nai truh; Kơdră teh đak bơ̆n Nguyễn Xuân Phúc năm tơmang tơ̆ teh đak Nga, Cuba, Campuchia; Thủ tướng teh đak bơ̆n Phạm Minh Chính năm tơmang teh đak Nhâ̆t, vang năm Hop akŏm kơpal ASEAN 'măng mă 38,39 păng dôm tơdrong hop akŏm kơpal đei tơrĕk; vang năm Hop akŏm 'măng mă 26 dôm khul vang jang lơ̆m Tơchơ̆t atŭm kơ Liên hơp kuôk găh hơyuh tô̆ 'mi tơplih (COP26) păng pơma dơnuh ƀar păh hăm khul kơpal kơ dôm teh đak, năm tơmang păng pơm jang tơ̆ teh đak Anh, Phlăng; Kơdră Kuôk hô̆i Vương Đình Huệ năm tơmang Châu Âu, Hàn Quốc, Ấn Độ…

Xơnăm 2021, hop akŏm Jang tơbôl jâ̆p teh đak pơm kiơ̆ Tơchơ̆t Hop akŏm 13 kơ Đảng noh hop akŏm jâ̆p teh đak mă blŭng kơyuơ Anih tơm Chĭnh trĭ, Anih jang Ƀĭ thư kơtă pơgơ̆r vă pơđăp găh tơdrong jang tơbôl kơ Đảng, jang tơbôl kơ teh đak, jang tơbôl kon pơlei păng pơđĭ anih jang chĭnh trĭ.

Lơ̆m xơnăm 2021, Việt Nam pơtoi iŏk jang xơnong dơnơm kăp gĭt lơ̆m apŭng plenh teh, jang Kơdră pơlơh ăh khei 4 păng vang jang lơ̆m Anih vei xơđơ̆ng tơpôl kơ Liên hơp kuôk, đei pôk jang lơ̆m Hô̆i đŏng Châ̆p hanh Anih Pơtho Pơhrăm, Khoa hŏk păng Joh ayŏ kơ Liên hơp kuôk (UNESCO). Việt Nam hlôi kơdih păng hăt hot vang jang lơ̆m tơdrong jang atŭm kơ anih jang pran kơ apŭng plenh teh; tơgop kăp gĭt lơ̆m tơdrong pơma đam, chă trong jang kiơ̆ trŏ pơkăp atŭm kơ tơpôl apŭng plenh teh, đei dôm teh đak hmach bơnê, tơbang tơdrong kăp gĭt păng anih dơ̆ng apŭng plenh teh roi năr roi kơjung kơ teh đak bơ̆n.

4. Hop akŏm Jŏh ayŏ lơ̆m tĕh đak pơjing ăn tơdrong hơpơi ‘mĕh vă hơdrĕch hơdrung, kiơ̆ yok rok jơ̆ng tơdrong ‘lơ̆ng liĕm lơ̆m jŏh ayŏ, jơhngơ̆m pran kơ bơngai Việt Nam.

VOV4.Bahnar - Đơ̆ng rŏng 75 sơnăm, tơgoăt iŏk dôm tơdrong ‘lơ̆ng hơ iă hlôi hơlen hơdăh đơ̆ng ƀar ‘măng Hop akŏm Jŏh ayŏ lơ̆m tĕh đak sơnăm 1946, 1948, Hop akŏm Jŏh ayŏ lơ̆m tĕh đak sơnăm 2021 đei hơmŏ tơgoăt dơ̆ng trong yak “jŏh ayŏ pơchŏh trong ăn kon pơlei lơ̆m tĕh đak drŭh kiơ̆”, lăng tơdrong jŏh ayŏ hơtŏ hăm tơdrong jang chĭnh trĭ, mŭk drăm, tơpôl, Hop akŏm Jŏh ayŏ lơ̆m tĕh đak jing hơnhăk tĕh đak bơ̆n jing hơyak kăl ba tĕh đak bơ̆n pơ̆ih trong atŏk tơ iung ‘nao, hăm jơhngơ̆m đon hơdrin pran kơtang kơ kon pơlei bơ̆n, đơ̆ng nŏh tơlĕch ăn rim trong atŏk tơ iung jŏh ayŏ oei sa Việt Nam gơ̆h hơgei, đei tôm tơdrong lơ̆m iung jang tơ iung pơjing păng atŏk tơ iung tĕh đak.

Iung pơma pơrô̆ tơ̆ hop akŏm, Tổng Bí thư Nguyễn Phú Trọng ‘mĕh vă, bơ̆ jang jŏh ayŏ gô đei hơyak pran kơtang, gơ̆h hơgei hle, pran kơtang hlŏh dơ̆ng, jơnei hlŏh dơ̆ng, pơjing đei hơyak pran ‘nao lơ̆m jăl trong hơmet pơ ‘lơ̆ng, atŏk tơ iung tơdrong jang jŏh ayŏ oei sa Việt Nam lơ̆m chăl hle.

5 – Pơrang jĭ Covid-19 pơrăm tih tên. Việt Nam tơlĕch ƀet pơgang bơ̆ng jĭ tih hloh lơ̆m hnưr erih.

‘Măng pơrang jĭ Covid-19 hơbuh mă 4, mă hăt noh tơplih yŏng Delta đơ̆ng  virus SARS-CoV-2, tơpoh lang xă tenh kuăng hlôi pơrăm tih tên, hăm tơdrong erih kon pơlei păng mŭk drăm tơpôl ăn dôm dêh char, plei tơm lơ̆m jâ̆p teh đak, mă kăl noh plei tơm Hồ Chí Minh păng dôm dêh char găh pơbăh. Jê̆ 30.000 ‘nu bơngai lôch, 346.000 tih hlj răm găh mŭk drăm jing dôm tơdrong răm hli hlơt đơ̆ng pơrang jĭ Covid 19 pơjing ăn teh đak bơ̆n. Mă lei, gơnơm dôm trong jang kơjăp, truh dang ei, pơrang jĭ Covid 19 mă duh oei hơbuh hli hlơt mă lei hlôi đei hơlen tang găn.

Khul kơpal teh đak tơchơ̆t pơjing Jên mong vaccine bơ̆ng jĭ Covid-19. Minh lơ̆m dôm tơdrong ƀet bơ̆ng jĭ tih hloh tơ̆ Việt Nam hlôi đei Thủ tướng Phạm Minh Chính tơlĕch. Atŭm hăm noh jing trong “jang tơbôl vaccine” đei pơm jang tenh kuăng, Việt Nam hlôi iŏk đei jê̆ 170 trĭu kơliu vaccine bơ̆ng jĭ COVID-19. Pơtôch xơnăm 2021, Việt Nam hlôi keh đang ƀet 2 ‘măng vaccine bơ̆ng jĭ ăn bơngai đơ̆ng 18 xơnăm tŏk tơ̆ kơpal, keh đang ƀet ‘măng mă 1 ăn bơngai đơ̆ng 12 - 18 xơnăm.

Kơjăp kiơ̆ “pơkăp jơhngơ̆m jăn, tơdrong erih đơ̆ng kon pơlei noh kơpal hloh, adrol hloh”, hăm tơdrong pơgơ̆r kơtă đơ̆ng Trung ương Đảng, Khul Kơpal teh đak, Thủ tướng teh đak, tơdrong jang tang găn păng tơjră pơrang jĭ hlôi đei dôm tơchơ̆t tơplih tơtom vă tơjră hăm pơrang jĭ Covid-19, đơ̆ng trong pơkăp “zero Covid” jing “trŏ ƀlep xơđơ̆ng, hơbĕch, hơlen đei jơnei pơrang jĭ Covid-19”, tang găn păng tơjră răh pơrang jĭ, hơmet hơtŏk răh mŭk drăm – tơpôl kiơ̆ tơchơ̆t 86 păng pơkăp 128 đơ̆ng Khul kơpal teh đak. Lơ trong pơkăp pơyua ăn tơpôl hăm kơsô̆ jên axong dôm jĭt rơbâu tih hlj hlôi đei tơlĕch jang, tơgŭm bơngai jang, bơngai kue, kon pơlei tơ̆ tơring hơbuh pơrang jĭ găn hloh tơnap tap lơ̆m tơdrong erih.

6. Yak hlŏh “hơbŭt” Covid-19, GDP oei tŏk kơtang. Lơ tơdrong hơ yă, pơjing hơyak pran ăn hơmet pơ ‘lơ̆ng mŭk drăm lơ̆m sơnăm kơnh.

VOV4.Bahnar - Mă đơ̆ng jĭ hơbŭh Covid-19 pơrăm kơtang mă lei hăm trong chĕp pơgơ̆r kơtang, hơbĕch hơbal gơ̆h hơgei đơ̆ng Khŭl kơdră Tĕh đak, tơdrong vang iung jang đĭ jơhngơ̆m đơ̆ng rim hơnĭh jang, tơring tơrang păng kon pơlei, tơdra hơdrol GDP kơ tĕh đak bơ̆n sơnăm 2021 oei tŏk kơtang; thuê̆ ăn kon jên bơ̆ jang Teh đak sơnăm 2021 oei sơđơ̆ng ƀlep hăm tơdra hơdrol păng tŏk lơ pơtêng hăm sơnăm 2020, tĕch răt tơmam drăm hăm tĕh đak đe iŏk đei lơ, hlŏh 600 ti dolar.

Dơnŏ anĭh mơdro sa Việt Nam jei pơgĕnh tôch ‘lơ̆ng tơdrong rơvơn đơ̆ng rim Khŭl mơdro sa hiôk hian, mă kăl rim Tơdrong pơkăp ‘nao, adoi tơgŭm đei lơ hơnĭh tĕch mơdro, adoi pơ̆ih să tĕch mơdro lơ tơmam drăm tơ̆ tĕh đak đe, đei iŏk yua kơ jăp. Sơnăm 2021 jei tơƀô̆h hơdăh tơdrong atŏk tơ iung kơtang kơ mơdro sa điên tư păng kmŭk drăm kơsô̆.

Vă iŏk đei trong tơlĕch ăn tŏk kơtang, lơ̆m sơnăm 2021, Việt Nam hlôi iok yua păng tôch ‘lơ̆ng rim trong jang păng kon jên hu adoi nhen trong tơgŭm djru. Kuô̆k hô̆i jei hlôi pơjing đei lơ Tơdrong tơchơ̆t găh kon jên bơ̆ jang tĕh đak, kon jên tĕh đak tơmơ̆t jang, hơmet pơ ‘lơ̆ng mŭk drăm. Khŭl kơdră tĕh đak tơ iung pơjing trong jang hơmet pơ ‘lơ̆ng mŭk drăm-tơpôl kiơ̆ trong trŏ lăp sơđơ̆ng păng hơbĕch hơbal; tơ iung pơjing trong jang kăl tang găn jĭ hơbŭh Covid-19.

7 – Tơdrong hơmet pơ ‘lơ̆ng Đảng pơtoi đei hơtŏk tôm tơdrong, đei hơyak ‘nao. Tang găn păng tơjră xa pơjĭp, kơnê̆ “ưh pơdơh, ưh pơdei”.

Hop akŏm Trung ương 4 jăl 13 tơbang Pơkăp kơsô̆ 21-KL/TW lơ̆m noh tơguăt tơdrong jang hơmet pơ ‘lơ̆ng Đảng hăm pơjing trong jang chĭnh trĭ; hơmet dôm tơdrong tơjruh găh đon kơchĕng chĭnh trĭ, đon bơnôh, trong erih xa. Anih tơm Chĭnh trĭ hơmet chih pơkăp găh tơdrong “kơnê̆”, keh đang Jơnŭm pơgơ̆r Trung ương găh tang găn păng tơjră xa pơjĭp jing Jơnŭm pơgơ̆r Trung ương găh tang găn păng tơjră xa pơjĭp, kơnê̆; atŭm hăm noh keh đang bơngai jang kơ Jơnŭm pơgơ̆r.

Ƀan châ̆p hanh Trung ương, Anih tơm Chĭnh trĭ hlôi tơbang 3 hla bar kăp gĭt tơrĕk truh tơdrong hơmet pơ ‘lơ̆ng Đảng hăm lơ anih ‘nao hơdăh. Noh jing: Pơkăp 14 đơ̆ng Anih tơm Chĭnh trĭ găh trong pơkăp jang păng vei lăng kang ƀô̆ rơgei, kơyuơ tơdrong pơyua atŭm; Tơchơ̆t 37 đơ̆ng Ƀan Châ̆p hanh Trung ương găh dôm tơdrong mă Đảng viên ưh gơh pơm; Tơchơ̆t 41 Anih tơm Chĭnh trĭ găh tơdrong athei pơdơh kơ jang hăm kang ƀô̆.

Tơdrong jang tang găn păng tơjră xa pơjĭp, kơnê̆ pơtoi đei khul kơpal pơgơ̆r păng jang kơjăp  “ưh pơdơh, ưh pơdei”. Anih jang Hơlen Trung ương hlôi akŏm hơlen, xek tơlang kih luơ̆t păng pơtruh nơ̆r xek tơlang kih luơ̆t 12 anih jang đảng păng 20 đảng viên lơ̆m Anih tơm Chĭnh trĭ, Ƀan Ƀĭ thư kơpal tơrĕk truh dôm tơdrong glăi mă Jơnŭm pơgơ̆r hơlen, pơgơ̆r (lơ̆m noh đei 3 bơngai jang kơpal, xơ̆ jang lơ̆m Trung ương Đảng, 2 thư̆ trưởng, 1 Kơdră dêh char, 1 Phŏ Ƀĭ  thư anih jang kơpal dêh char, 13 sih kuan yŏng lơ̆m khul linh).

8. Tơkêng, hơnhăk xek tơlang kơhret lơ tơdrong pơm glăi tĭh, hli hlơt.

VOV4.Bahnar - Mă đơ̆ng đei ƀơm kơnê̆ đơ̆ng jĭ hơbuh Covid-19, mă lei rim tơdrong pơm glăi găh jang mŭk drăm, sa pơgơ̆m pơjĭp jei đei rim hơnĭh xek tơlang iung jang xek tơlang ƀlep khôi luơ̆t tơchơ̆t; xek phak kơhret hăm dôm bơngai dơ̆ng đơ̆ng rŏng, pơgơ̆m jang kơchư̆k tĭh pơjĭp iŏk lơ mŭk drăm kơ Tĕh đak. Sơnăm 2021, Dơnŏ anĭh bơ̆ jang Tư phap tơkêng ‘nao lơ tơdrong yoch tĭh, kơtang, hli hlơt nhen:Rim tơdrong pơm glăi lơ̆m tơdrong jang pơgang; tơdrong đei pơm glăi tơ̆ mĭnh ƀar hơnĭh jang găh Dơnŏ anĭh tơm chĕp pơgơ̆r Kanh sat đak dơsĭ, Ƀô̆ đô̆i vei lăng sơlam tĕh đak; rim tơdrong pơm glăi tơdrong tơchơ̆t vei lăng groi tĕh, vei lăng, iŏk yua mŭk drăm Tĕh đak đei ƀô̆h tơ̆ Bình Dương, Khánh Hòa, pơlei tơm Hồ Chí Minh...

Pơlơ̆m lơ̆m tơdrong ‘mĕh vă khăm hơlen tơ̆ rim tơring lơ̆m tĕh đak, Kŏng ty Việt Á hlôi đei trong tơgoăt pôm ƀơ̆r đon hăm rim hơnĭh jang, rim bơnbgai đei ƀơm trŭh, pơm glăi kơtang tơdrong tơchơ̆t pơm tơlĕch, tĕch mơdro kmăi kmŏk khăm hơlen jĭ Covid-19 vă sa hơpăh kơ dĭh. Dăr lăng hơlen ‘măng mă blŭng sơkơ̆t hơdăh, Kŏng ty kmăi kmŏk Việt Á hlôi tĕch mơdro kmăi kmŏk khăm jĭ ăn 62 dêh char, pơlei tơm, iŏk đei vă jê̆ 4.000 ti hlak jên. Dơnŏ anĭh jang dăr lăng hlôi jang tơkêng tơdrong pơm glăi, tơkêng bơngai pơm glăi vă hơnơ̆ng dăr lăng hơlen, pơm hơdăh, mă lei, tơdrong au jei tơlĕch đei lơ nơ̆r apĭnh găh hơnăp jang đơ̆ng rim hơnĭh bơ̆ jang lơ̆m tơdrong iung jang dăr lăng, lăng hơlen, xek phak pơm glăi tang găn jĭ hơbŭh Covid-19

9 – Trong gre treng Cát Linh- Hà Đông pơtơm tơmơ̆t yua đơ̆ng rŏng kơ lơ tơdrong ưh kơ ‘lơ̆ng. Lơ ƀai hŏk “kăp gĭt” đei băt hơdăh đơ̆ng tơdrong ming man âu

Đơ̆ng rŏng 10 xơnăm, 4 ‘măng ưh đei trŏ pơkăp, năr 5/11/2021, jăl trong gre treng Cát Linh - Hà Đông  -  tơdrong man trong gre trengt ơring kơdrâ̆m mă blŭng tơ̆ Hà Nội păng jâ̆p teh đak – pơtơm đei tơmơ̆t yua.

Đơ̆ng jên axong mă blŭng hloh 8.770 tih hlj, tơdrong jang “hloh pơkăp” truh 18.002 tih hlj. Kiơ̆ tơlĕch mă blŭng đei xơkơ̆t tơmơ̆t iŏk yua đơ̆ng khei 6/2015, đơ̆ng rŏng lơ ‘măng pơdui khei năr, truh blŭng khei 11/2021, jăl trong gre treng Cát Linh – Hà Đông pơtơm đei tơmơ̆t yua gơnơm đei tơdrong pơgơ̆r kơjăp păng tơnăp đơ̆ng Jơnŭm pơgơ̆r jăl jang ‘nao.

Anih tơm jang găh trong nơnăm, Anih vei lăng kon pơlei plei tơm Hà Nội hlôi iŏk xơnong jang, tơlĕch tơdrong tơm, băt hơdăh ƀai hŏk pơm ăn tơdrong ming man adar, jên jang hloh pơkăp, lơ̆m noh mă tơm noh dôm tơdrong tơrĕk truh pơkăp đơ̆ng luơ̆t teh đak găh axong ming man tơm păng tơdrong pơ ‘nguaih hrŭ ‘mong anih teh tơmăn.

10. ‘Măng mă blŭng lơ̆m chăl sơnăm, khŭl đă ƀŏng lŏng tĕh đak Việt Nam đei mơ̆t đă lơ̆m đă pơjei dĭh băl mă 3 World Cup 2022 tơring châu Á.

VOV4.Bahnar - Sơnăm 2021, khŭl đă ƀŏng lŏng Việt Nam ‘măng mă blŭng yak trŭh ‘măng đă pơjei tuch luch World Cup tơring châu Á.

‘Nau ư̆h khan tơƀô̆h hơdăh găh tơdrong iŏk đei jơnei mă lei oei tơbăt hơdăh tơdrong yak hlŏh tơdrong kĕ păng jơhngơ̆m đon kơ tơdrong đă ƀŏng lŏng. Tơdrong đei chă đă hăm rim khŭl đă pran kơtang lơ̆m tơring tơgŭm ăn rim bơngai đă ƀŏng lŏng Việt Nam đei dơ̆ng tơdrong kơnăl, nuih, hơbĕch hơbal, adoi pơjing hơyak blŭng a vă rim khŭl đă ƀŏng lŏng Việt Nam hoei kơ hli mư̆h vang đă pơjei dĭh băl lơ̆m ‘măng pơlong tĭh.  

Khŭl ƀŏng đă Việt Nam hlôi đei mĭnh hơyak ‘lơ̆ng hơ iă vă kĕ dơ̆ng tơ̆ ‘măng jang vang mơ̆t đă lơ̆m World Cup mă đơ̆ng tơdrong plôih ‘măng au oei tŏk bŏk gô chang lăng tơ̆ hơnăp kơnh.

Tơblơ̆ nơ̆r: Amazưt-Lan