Lơ̆m jơ ‘năr ‘lơ̆ng hơ iă, phăl hơlăng, ƀar ‘nu kơdră chĕp pơgơ̆r hlôi pơma dơnuh dih băl găh dôm tơdrong lơ̆m teh đak kơdih, tơdrong tơgoăt tơgoăl dih băl păng rim tơdrong lơ̆m tơring, apŭng plĕnh teh vang lăng truh. Ƀar păh pơma hơdăh tơdrong tơlĕch jang lăng truh jang gĭt kăl găh tơgoăt mŭk drăm lơ̆m chăl hle, lăng truh trong tơlĕch ăn tĕch mơdro dih băl iŏk đei 150 ti USD lơ̆m sơnăm 2030; adoi pơkăp hơnơ̆ng pơjing rơvơn mơdro sa, plôih ‘măng mơdro sa păng tơgum djru hơnih mơdro sa Việt Nam vang iung jang kơtang lơ̆m trong tech mơdro kơ Hàn Quốc. Tổng Bí thư, Kơdră chĕp pơgơ̆r teh đak Tô Lâm athei ƀar păh atŏk kơtang jang hơdoi chă tơchĕng hơlen, pơtho tơbăt kmăi kmŏk, mă kăl tơlĕch jang kiơ̆ jơnei Tơdrong vă jang pơjing Viện Khoa học păng Kmăi kmŏk Việt Nam - Hàn Quốc (VKIST). Ƀok Kơdră tơm Li Che Miêng tơbăt, Hàn Quốc gô plang ăn kmăi kmŏk lơ̆m rim tơdrong jang kmăi kmŏk kăl nhen, trí tuệ nhân tạo, bán dẫn, ŭnh hơyuh rơgoh ‘lơ̆ng, pơtho pơjing khul jang hơgei, tơgop tơgum djru ‘măng iung jang kmăi kmŏk hơgei teh đak păng atok tơ iung khoa hŏk kmăi kmŏk gơh hơgei hloh kơ Việt Nam; athei ƀar păh atok kơtang tơgoăt trong jang tơplih ‘nao tơchăr, pơjing tơdrong jang tơchăr kơ ƀar teh đak.