Dêh char Dak Lăk băt hơdăh hơmet ming bơ̆jang ‘noh jĭ tơdrong jang tŏk, tơklep hăm hơnăp jang bơngai chĕp kơ̆l. Sơnăm 2026, Đắk Lắk tơlĕch tơdrong hơgăt  tơjur 15% hla bơ ar, 10% hop akŏm; 100% hla bơ ar pơm kiơ̆ trong 1 ‘măng; kăt tơjur 50% jơ năr, kon jên pơm kiơ̆ ăn anih mơdro sa. Đắk Lắk tơlĕch ăn tơdrong hơgăt mơ̆t lơ̆m grŭp 10 dêh char dơ̆ng hơdrol găh hơmet ming bơ̆jang. Tơdrong tơm hơmet ming ‘noh pơm ƀônh bơ̆n hla bơ ar păng tŭn pran tơplih kơsô̆, hăm ‘meh vă pơm bơ̆n hla bơ ar hăm kơmăy kơsô̆ pơđĭ, tơgoăt hrơ̆ch hăm Anih pơvih pơvăn teh đak, vei sơđơ̆ng tơdrong jang rơđăh, dăr lăng tơpăt. Dôm tơdrong jang đei ƀôh lơ nơ̆r tơroi nhen teh gô đei hơtŏk loi dơ̆ng hơlen lăng, sek phak kơhret tơdrong ưh kơ ‘lơ̆ng; bơ̆jang kiơ̆ apĭnh pơtruh ‘nĕ jô̆ yo mưh pơm hla bơ ar hiơ̆ khei ‘năr pơkăp. Dêh char kŭm tŭn pran pơma dơnuh hăm kon pơlei, anih mơdro sa vă hơlen lăng hơdăh đei yua hơmet ming.