Pơma tơ̆ jơ bơ̆jang, Thủ tướng Lê Minh Hưng  athei, hơnăp jang hơtŏk tơiung teh đak lơ̆m jăl jang ‘nao ‘noh tôch kơ rơđăh, hơnăp jang kiơ̆ ‘noh tôch kơ tih, mă loi ‘noh jĭ tơdrong vei sơđơ̆ng tơdrong hơgăt jang tŏk kơjăp 02 kơsô̆, lơ̆m noh, Anih tơm, anih jang găh kơmăy kơmŏk tĕch mơdro athei pŭ hơnăp jang tơm, iung jang hơdrol hơmet pơ ‘lơ̆ng dôm tơdrong oei đei păng pơtrŭt dôm tơdrong jang pơm tơlĕch tĕch mơdro vă iŏk đei tơdrong hơgăt tơlĕch ăn.

Thủ tướng pơma hơdăh, Anih tơm vei lăng găh Kơmăy kơmŏk, tĕch mơdro kăl kơ jăh jang kiơ̆ ‘lơ̆ng păng pơgơ̆r bơ̆jang kiơ̆ tơtom Trong tơlĕch jang kiơ̆ Tơdrong bơ̆jang đơ̆ng Khŭl kơdră teh đak jang kiơ̆ Tơdrong tơchơ̆t Hop akŏm XIV kơ Đảng, Tơchơ̆t kơsô̆ 18 đơ̆ng Trung ương... vă tơlĕch jang dôm tơdrong tơm lơ̆m rim tơdrong jang vei lăng đơ̆ng Anih tơm vei lăng găh Kơmăy kơmŏk, mơdro sa ( ŭnh hơyuh, đak xăng đak dâu, khoa hŏk kơmăy kơmŏk, tơplih ‘nao hơgei, tĕch tơ̆ teh đak đe, tĕch mơdro lơ̆m teh đak); pơjao dôm tơdrong hơgăt, blŭng tơdrong jang, khei ‘năr pơkăp jang đang hơdăh ăn kơ rim Kơdră chĕp kơ̆l anih tơm, anih jang lơ̆m anih tơm, dôm grŭp jang mŭk drăm teh đak, tơring.