Tơ̆ jơ bơ̆ jang, Tổng Bí thư, Kơdră teh đak Tô Lâm tơcheng ‘lơ̆ng dôm tơdrong jang đei lơ̆m rim tơdrong mă Đảng ƀô̆, khul kơdră pơgơ̆r păng kon pơlei Hà Tĩnh iŏk đei lơ̆m khei ‘năr âu ki.

Tơ̆ hơnăp kơnh, Tổng Bí thư, Kơdră teh đak athei, dêh char Hà Tĩnh tơplih ‘nao đon tơchĕng, trong vă jang păng trong pơgơ̆r; pơjing trong jang tŏk pran ‘lơ̆ng, pơjing tơdrong jang tŏk hrĕnh păng kơjăp, iŏk kon bơngai pơm tơm, khoa hŏk – kơmăy kơmŏk, tơplih ‘nao rơgei păng tơplih hăm kơmăy sô̆ pơm jơhngâm pran, tơlĕch jang mă đei yoa tơdrong tơchơ̆t 57 đơ̆ng Anih Chinh trĭ vă pơjing hơyak tŏk pran, đei yoa mưh bơ̆ jang.

Tổng Bí thư, Kơdră teh đak Tô Lâm lui, hăm đon rơgei păng hơpơi ‘mĕh jang tŏk, Đảng ƀô̆, khul kơdră pơgơ̆r păng kon pơlei Hà Tĩnh vă hơnơ̆ng mât 1 ƀơ̆r đon, tơplih ‘nao, tưk tơiung jơhngâm đon “Jơva hơgơ̆r Xô Viết Nghệ Tĩnh”, jang tŏk hrĕnh, tôm tơdrong păng kơjăp ‘lơ̆ng, vang tơgop tơgăl ăn tơdrong jang tŏk atŭm kơ teh đak.