Tổng Bí thư, Kơdră teh đak bơ̆n Tô Lâm sơkơ̆t hơdah, lêh tơbăt jĭ 'măng vă tôm Đảng, tôm kon pơlei, tôm khul linh ƀlŏk tơbăt kơ dôm tơdrong plang tih tên đơ̆ng ƀok Hà Huy Tập hăm tơdrong jang kăch mang, atŭm hăm noh tơ-iung đon bơnôh pơm jang, tơdrong hơpơi hơtŏk tơ-iung păng sơnong jang hăm teh đak. Tơdrong hơrih pơm jang kăch mang kơ ƀok Hà Huy Tập jĭ um pơtih 'lơ̆ng rŏ kơ minh 'nu bơngai sơnăm mơlôh hŏk kơjung băt 'mêm kơ teh đak, đơ̆ng 'lơ̆p vang jang lơ̆m trong jang tơgŭm dŏng teh đak đơ̆ng ƀok kơdră Nguyễn Ái Quốc.

Hăm ƀok đon tơchĕng, trong pơm jang gơh hơgei nuih mơng, trŏ kơ đon bơnôh bơngai cộng sản tơpăt 'lơ̆ng, đĭ jơhnơr hơrih pơm jang ăn tơdrong jang kăch mang kơ Đảng păng kon pơlei. Mă lơ̆m khei năr tơnap tap hloh, ƀơm ayăt teh dong dah mă ƀơm pơkăp phak pơlôch, ƀok adoi vei minh bơnôh hăm Đảng, hăm kon pơlei. Kiơ̆ Tổng Bí thư, Kơdră teh đak, lơ̆m jăl jang 'nao, đon bơnôh 'noh athei jing trong tơm ăn rim kang ƀô̆, đảng viên: pơ̆n tơchĕng, pơ̆n pơm jang, chiu pŭ rim sơnong jang đei pơjao, pơm jang ăn tơdrong pơyua atŭm; iŏk tơdrong jang đei, iŏk tơdrong hiôk 'lơ̆ng kơ kon pơlei vă pơm trong pơkăp kơjung hloh.