Đơ̆ng rŏng mơ̆ng dôm anih jang roi tơbăt, pơma pơtôch, Phŏ Thủ tướng Hồ Quốc Dũng pơma hơdăh, tơdrong hơtŏk tơiung kơmăy kơmŏk gĭt kăl tơklep hăm tơdrong hơtŏk tơiung kơ teh đak ‘noh jĭ tơdrong gĭt kăl; yua thoi noh rim anih tơm, anih jang athei mơ̆t jang; athei pơ̆n tơmơ̆t jên jang, chu iŏk ưh kơ pŭn ai, tơgĕch iŏk yua tơdrong ‘lơ̆ng “năm đơ̆ng rŏng” vă năm hrĕch, sơng hơdrol.

Phŏ Thủ tướng athei lơ̆m khei 4/2026: Pơjing Grŭp bơ̆jang hơdai; dôm anih tơm, anih jang tơroi hơnăn păng tơlĕch ăn hơnăn kơmăy kơmŏk gĭt kăl. Đơ̆ng rŏng ‘noh, dôm anih tơm athei tơlĕch jang hloi hơnăp jang păng tơlĕch jên jang. Hơdai hăm ‘noh, dôm anih tơm: Khoa hŏk păng Kơmăy kơmŏk, Jên hu, Pơtho pơhrăm athei tŭn pran pơtho pơhrăm bơngai jang, chih hơmet pơkeh trong jang tơgŭm jên hu. Anih vei lăng găh pơtho pơhrăm kăl kơ đei tơdrong jang tơgŭm gĭt kăl pơtrŭt pơtho pơhrăm bơngai jang Kơmăy kơmŏk gĭt kăl.