Tơ̆ hơnăp tơdrong pơmat găh jên jang yoa yă tơmam tŏk, tŏ ‘mi kial ưh ‘lơ̆ng, pơrang jĭ phă păng tơdrong ‘mĕh chă đei tơmam ‘lơ̆ng roi dêh, HTX Vĩnh Cường tơ̆ xăh Vĩnh Mỹ (dêh char Cà Mau) akŏm jơhngâm tưk tơiung tơdrong jang kiơ̆ trong pơm tơlĕch, tĕch mơdro phe ƀa kiơ̆ Tơdrong jang 1 triu ha ƀa ‘lơ̆ng, tơjur ƀiơ̆ tơdrong pơm tơlĕch kơchơ̆t ‘mê̆ ‘mach tơ̆ tơring the tơmăn đak krong Cửu Long. Hrei ‘nâu, tơdrong choh jang xa đơ̆ng HTX Vĩnh Cường đei hlŏh 10.000 ha chŭn, lơ̆m noh dang 5.000 ha jang hơdoi kiơ̆ trong rei pơtăm ƀa ‘lơ̆ng. Tơdrong pha ƀiơ̆ lơ̆m trong jang hơdoi ‘nŏh đei hloi tơdrong vang jang đơ̆ng anih tĕch mơdro đơ̆ng blŭng hloi. Tơdrong pơtruh hơdrĕch, pơtho ki thuơ̆t  jang, vei lăng tơmam ‘lơ̆ng truh kăt yoă, răt iŏk tơmam đei bơ̆ jang kiơ̆ hla ar pơkăp ngăl. 

Ƀok Trịnh Văn Cường – Kơdră chĕp kơ̆l HTX Vĩnh Cường ăn tơbăt, tơdrong đei yoa đơ̆ng trong jang hơdoi ưh lăp tơƀôh ƀât tơdrong jang xa đei iŏk yoa roi tŏk lơ đĕch mă sư oei pơm tơplih đon tơchĕng mưh choh jang xa đơ̆ng kon pơlei dơ̆ng. Đơ̆ng druh kiơ̆ trong jang đei lơ tơmam, dôm bơngai jang lơ̆m HTX tơplih jing năng kăl tơdrong jang đei tơmam ‘lơ̆ng, chih hơdăh anih jang đei tơmam păng vei lăng tơmam rơgŏh ‘lơ̆ng.

Ƀok Trịnh Văn Cường ăn tơbăt: “HTX ưh pă jang kiơ̆ trong jang so, ưh đei rơđăh rơđong păng ‘mĕh jang kiơ̆ trong jang hơdoi hăm anih jang mŭk drăm kơdih, HTX athei đei khul vei lăng rơgei, đei trong tĕch mơdro lăp ‘lơ̆ng, gơ̆h vei lăng jên, đei trong tĕch mơdro đunh đai, athei lui HTX jing 1 anih jang mŭk drăm tơpă, đei đon kơchăng vang jang lơ̆m trong jang hơdoi, pơm hơtŏk kơjă tơmam.” 

Mŭk drăm Việt Nam oei tơplih kiơ̆ trong jang rơgoh ‘lơ̆ng, jang hăm kơmăy sô̆, yoa thoi noh anih jang mŭk drăm atŭm, HTX oei dơ̆ng tơ̆ hơnăp nơ̆r athei tơplih ‘nao tôm tơdrong găh đon tơchĕng, trong pơgơ̆r jang. Tơdrong vang jang hơdoi hăm Anih jang mŭk drăm kơdih đei năng jĭ trong jang tôch gĭt kăl vă jang hơdoi, pơm ăn HTX đei kơsư̆k pơjei pran, jang xa, tĕch mơdro rơgei lơ̆m chăl hrei ‘nâu. 

Kiơ̆ yă Nguyễn Thị Hoàng Yến – Phŏ Kơdră vei lăng Anih jang mŭk drăm hơdoi păng atŏk tơiung tơring tơrang (Anih tơm vei lăng choh jang xa păng cham char), lơ HTX đei tơdrong jang xa oei iĕ, ưh gơ̆h pơm đei tơmam ‘lơ̆ng păng ưh tam druh kiơ̆ tom tơdrong tĕch mơdro tơ̆ ‘ngoăih. Tơdrong ‘nâu jing pơm tơlĕch tơdrong “jang đei tơmam lơ ‘noh ưh đei yă”, jang xa ưh đei trong jang đunh đai. Kơplăh ‘nŏh, anih jang mŭk drăm kơdih sư đei tơdrong ‘lơ̆ng ‘nŏh jên jang lơ, đei kơmăy kơmŏk ‘nao, đei anih tĕch tơmam lơ păng druh kiơ̆ tom tơdrong tĕch mơdro lơ̆m teh đak păng apŭng plenh teh. Tơdrong hơtŏk trong jang hơdoi đơ̆ng HTX hăm anih jang mŭk drăm kơdih gô dar deh pơjing đei lơ trong pơm hơtŏk kơjă tơmam kơjăp ‘lơ̆ng.

Yă Nguyễn Thị Hoàng Yến pơma: “Tơdăh choh jang xa đei tơplih jing jang xa tih, rơgŏh ‘lơ̆ng, kơjăp đunh păng pơm kiơ̆ dôm tơdrong hơgăt ‘nŏh athei chih hơdăh anih jang đei tơmam vă hơtŏk tơdrong rơđăh rơđong, păng nhôn ƀôh hơdăh tơdăh anih tĕch mơdro tơmât jên jang, kơmăy kơmŏk păng vei lăng ‘nŏh HTX gô pơgơ̆r jang xa, jang đei tơmam ‘lơ̆ng. Păng tơdăh jang đei 2 tơdrong ‘nâu ‘noh bơ̆n gô ƀôh tơdrong đei yoa đơ̆ng anih tĕch mơdro, HTX păng bơngai jang chŭn mir, tơplih đơ̆ng jang iĕ, jing jang hơdoi kơjăp ‘lơ̆ng.”

Vă trong jang hơdoi đơ̆ng HTX hăm Anih jang mŭk drăm kơdih tŏk pran kơjăp ‘nŏh jên tơmât jang jĭ 1 lơ̆m dôm tơdrong tôch gĭt kăl. Mă tơpă ăn ƀôh, lơ HTX oei tơƀâp pơmat tat mưh tŏk iŏk jên vă jang  yoa ưh đei tơmam vă pơdơ̆ng, tơdrong vei lăng jên hu oei tam gan rơgei. Tơdrong ‘nâu pơm ăn HTX hơnat vă tơlĕch jên răt kơmăy kơmŏk dăh mă pơih xă tơring pơtăm. Mưh HTX vang jang hơdoi hăm anih tĕch mơdro, tơdrong krê ưh đei jên jang roi jur ƀiơ̆ gơnơm đơ̆ng hla ar pơkăp răt iŏk pơđĭ tơmam jang đei păng jên tơlĕch jang sơđơ̆ng. 

Yă Cao Xuân Thu Vân – Kơdră Grŭp HTX Việt Nam akhan, atŏk tơiung trong jang hơdoi jĭ tơdrong tôch gĭt kăl vă pơjing trong jang mŭk drăm atŭm kơjăp ‘lơ̆ng. Trong jang hơdoi gô pơjing đei jơhngâm pran, pơm tơplih trong jang hăm kơmăy sô̆ lơ̆m anih jang mŭk drăm atŭm, HTX. Tơdrong ‘nâu gô tơgŭm pơm hơtŏk tơdrong rơđăh rơđong, jang xa rơgei păng sơng đei lơ bơngai jang oei mơlôh vang mât bơ̆ jang tơ̆ anih jang mŭk drăm atŭm. Yoa thoi noh, tơlĕch trong jang hơdoi đơ̆ng HTX hăm anih jang mŭk drăm kơdih ưh lăp trong vă jang đĕch mă oei jing tơdrong gĭt kăl vă hơtŏk kơsư̆k pơjei ăn tơmam đơ̆ng choh jang đei kơ Việt Nam lơ̆m tơdrong pơtruh tơmam jơ̆p plei teh.

Yă Cao Xuân Thu Vân pơma hơdăh: “Lơ̆m tơdrong jang hơdoi mă bơ̆n apinh tơdrong mơnat đơ̆ng bơngai nai ‘nŏh tôch mơmat, mă athei jang xa mă tơpăt ‘lơ̆ng, rơđăh rơđong, ‘mĕh thoi noh athei jang kiơ̆ dôm tơdrong hơgăt. Mă 2 ‘nŏh chih hơdăh hơnăn tơmam jang đei, hơnăn anih tĕch mơdro tơgŭm ăn HTX. Păng mưh jang pran ‘lơ̆ng bơih, HTX gô đei bơngai jang chă rơih hơmet Khul vei lăng rơgei păng đei jên tơlĕch jang kơdih.”

Hăm dôm tơdrong tơplih ‘nao găh trong jang, tơdrong tơgŭm đơ̆ng Khul kơdră teh đak lơ̆m chăl jang tŏk ‘nao, anih jang mŭk drăm atŭm, HTX ưh pă đei năng anih jang “tơrăn kiơ”, mă hlôi jing 1 anih jang “gĭt kăl” lơ̆m rim anih jang mŭk drăm kơdih. Mưh HTX đei tơgŭm trŏ ƀlep ‘nŏh gô jing jơhngâm pran gĭt kăl vă tưk tơiung kơjă tơmam đơ̆ng anih choh jang xa Việt Nam tŏk pran kơjăp, đơ̆ng noh vang tơgop hơmet pơ ‘lơ̆ng tơdrong arih xa, pơm hơtŏk iŏk yoa ăn kon pơlei jang chŭn mir tơ̆ teh đak bơ̆n.