Tang măt ăn kơdră chĕp kơ̆l Đảng, Teh đak, Thủ tướng Lê Minh Hưng chơt hơiă pơjao hơnăn "Khul linh tơblăh kơtang kơ kon pơlei" ăn Khul linh tơblăh kơ Quân khu 4. ‘Nâu jĭ tơmam hơpăh tôch kăp gĭt đơ̆ng Đảng, teh đak păng kon pơlei, chih hơdăh dôm tơdrong jơnei gĭt kăl, tôch ‘lơ̆ng, atŭm hăm ‘nŏh pơma hơdăh, chăl arih hlôi pơjao ăn Quân khu 4 dôm tơdrong nol tih, tôch krê hơmơt.

Pơma akhan, Teh đak oei yak mât lơ̆m 1 jăl trong ‘nao đei nơ̆r athei, tơdrong jang ‘nao tôch tih vă vei lăng sơđơ̆ng ‘lơ̆ng teh đak ăn khul linh, lơ̆m noh đei Quân khu 4, Thủ tướng athei, khul linh găh Quân khu 4 akŏm jơhngâm hŏk pơhrăm hlôh vao hơdăh đon tơchĕng, tơdrong hlôh vao ‘nao găh khul linh, vei lăng teh đak kiơ̆ Tơdrong tơchơ̆t đơ̆ng Hop akŏm mă XIV kơ Đảng; jang ‘lơ̆ng tơdrong jang tơdra hơdrol, roi tơƀôh dôm trong jang tơm, đunh đai, vei kơjăp tơdrong sơđơ̆ng, rơngei hiôk hian vă pơjing, jang tŏk teh đak, ưh gơ̆h lê̆ đei tơdrong ưh tom băt lơ̆m rim tơdrong; akŏm jơhngâm pơjing khul linh Quân khu 4 kăch mang, rơgei, kơtang, ‘lơ̆ng rŏ; hơnơ̆ng hơmet ming trong pơgơ̆r kiơ̆ trong tŏ sĕt bơngai, jang rơgei, đei yoa, pran kơtang, hrơ̆ch ‘lơ̆ng; gơ̆h iŏk yoa phao kơtoang, kơmăy kơmŏk ‘nao.