Lơ̆m khei ‘năr jên chơ păng tơmam tơmơ̆t jang tŏk măt, Kŏng ti Yến sào Khánh Hòa oei pơvei jang tŏk ‘lơ̆ng. Jăl khei mă I/2026, iŏk yua akŏm đơ̆ng anih mơdro sa đei dang 1.040 ti hlak jên, tŏk 19% pơting hăm khei ‘nâu sơnăm hơdrol, jang keh đang hloh 30% trong tơlĕch jang iŏk yua kơ sơnăm. Kiơ̆ kơ yă Trịnh Thị Hồng Vân, Kơdră vei lăng Khŭl jang hơdai Kŏng ti Yến sào Khánh Hòa, anih mơdro sa tŭn pran tĕch mơdro, pơih să anih tĕch mơdro tơ̆ teh đak đe, mă kăl ‘noh jĭ anih tĕch mơdro Trung Quốc. Hơdai hăm ‘noh, kŏng ti tơlĕch lơ trong jang pơm tơ jur jên jang vă vei sơđơ̆ng kơjă tĕch, vei sơđơ̆ng tơdrong kĕ pơjei đơ̆ng tơmam.

“Dôm anih tĕch mơdro tôch kơ hơlen nhen Mi, Úc, Canada tă kơ ‘meh vă ‘lơ̆ng ngăl, mă lei ‘meh vă tơchă băt anih pơm tơlĕch đơ̆ng anih tĕch mơdro Trung Quốc oei kơhret hloh, đơ̆ng tơdrong bơ̆jang, pơm tơlĕch trŭh tĕch tơ̆ teh đak đe păng năm chơ chuĕn. Yua thoi noh, anih mơdro sa tŏk bŏk hơnơ̆ng jang hơdai hăm dôm anih jang hơdai păng grŭp jang tih tơ̆ Trung Quốc vă pơih să anih tĕch mơdro păng hơtŏk tơiung hơnăn Yến sào Khánh Hòa”.

Hơdai hăm tơdrong hơdrin đơ̆ng anih mơdro sa, tơdrong jang pơtrŭt tơmơ̆t jên jang sơnăm 2026 kơ dêh char Khánh Hòa dai akŏm sơng iŏk jên jang apŭng plĕnh teh lơ̆m dôm tơdrong jang tơm nhen kơmăy kơmŏk, ŭnh hơyuh, chă tơmang lăng – pơvih pơvăn păng anih kơdrơ̆m – ming man. Tơdrong hơgăt lơ̆m sơnăm ‘nâu ‘noh jĭ sơng đei tŏ sĕt hloh 2 tơdrong jang FDI đei akŏm jên tơmơ̆t jang đơ̆ng 100 triệu USD tơ̆ kơpal. Ƀok Trần Minh Chiến, Kơdră Khŭl vei lăng Anih jang mŭk drăm păng dôm Anih jang kơmăy kơmŏk dêh char Khánh Hòa tơbăt, tơdrong jang pơtrŭt tơmơ̆t jên jang đei anih jang băt hơdăh dôm anih jang hơdai tơpă, tơgoăt dôm anih jang tơbôl păng anih jang apŭng plĕnh vă roi tơƀôh tơdrong hiôk tơmơ̆t jên jang tơ̆ tơring.

“Mưh dôm bơngai tơmơ̆t jên jang đơ̆ng teh đak đe đei ‘meh vă chă hơlen lăng, hmă hmă đe sư gô pơma dơnuh, apĭnh hăm anih jang tang măt kơ teh đak kơdih hơdrol. Yua thoi noh, tơdăh bơ̆n tơroi tôm tơdrong kơtơ̆ng ang ăn kơ dôm anih jang tang măt ‘noh gô tôch kơ hiôk. ‘Moi kiơ̆ tơdrong pơvei âu, dôm anih jang tang măt kŭm gơh roi tơƀôh păng tơgŭm pơma dơnuh hăm bơngai tơmơ̆t jên jang, hơvơn đe sư mơ̆t vang jang, dăr lăng, hơlen lăng”.

Hơdai hăm sơng đei tơmơ̆t jên jang, Khánh Hòa kŭm tŭn pran pơtrŭt tĕch mơdro, tơgŭm anih mơdro sa pơih să tĕch mơdro tơ̆ teh đak đe, Mĭnh trong năm ‘nao ‘noh jĭ tơchă đei anih tĕch mơdro Halal, anih tĕch mơdro hăm hloh 2 ti ‘nu bơngai răt yua lơ̆m apŭng plĕnh teh. Dôm anih tĕch mơdro lơ̆m tơring đei tơgŭm pơm hơmet pơ ‘lơ̆ng tôm hla ar pơkăp Halal, hơtŏk ‘lơ̆ng tơmam păng pơih să tĕch tơ̆ teh đak đe dôm tơmam pran ‘lơ̆ng.

Lơ̆m tơdrong jang tơmang lăng, Khánh Hòa hơnơ̆ng pơtrŭt dôm anih tĕch mơdro tơm nhen Hàn Quốc, Ấn Độ păng Nga; hơdai hăm pơgơ̆r dôm khŭl famtrip kơ anih mơdro sa găh chă tơmang lăng apŭng plĕnh teh truh hơlen lăng hơnih năm truh păng tơmam chă tơmang lăng. Kiơ̆ kơ ƀok Trương Văn Tiến, Kơdră vei lăng Anih pơtrŭt Tơmơ̆t jên jang, Tĕch mơdro păng Chă tơmang lăng dêh char Khánh Hòa, dôm tơdrong jang pơtrŭt gô pơih să anih tĕch mơdro đơ̆ng tơmoi apŭng plĕnh teh, hơdai hăm pơtrŭt răt yua păng tĕch tơ̆ teh đak đe kơtă anih anih ‘moi kiơ̆ chă tơmang lăng.

“Lơ̆m khei ‘năr hrei ‘nâu, nhôn tŭn pran tĕch răt lơ̆m teh đak, hơdai hăm hơnơ̆ng pơih să tơ̆ dôm anih tĕch mơdro mă dêh char hlôi kĭ hla ar pơkăp jang hơdai, mă kăl ‘noh jĭ dôm tơring ưh kơ gan đei ƀơm kơ nê̆ yua đơ̆ng tơplih găh ‘ngoăih. ‘Moi kiơ̆ dôm tơdrong jang pơtrŭt păng jang hơdai, chă tơmang lăng kŭm gô tơgop pơm pơtrŭt răt yua păng tĕch tơ̆ teh đak đe kơtă hơnih”.

Kiơ̆ kơ ƀok Nguyễn Việt Hùng, Kơdră Anih vei lăng kon pơlei dêh char Khánh Hòa tơdrong jang pơtrŭt tơmơ̆t jên jang kơ dêh char tŏk bŏk tơplih đơ̆ng trong jang pơ mơ̆ng jing kơchăng tơchă rim bơngai tơmơ̆t jên jang lơ, kiơ̆ lơ̆m tơdrong đei lơ tơmam găh mŭk drăm đak dơsĭ, tơnŏk đak dơsĭ păng logistics:

“Khánh Hòa đei tơmam ‘lơ̆ng, mă loi ‘noh jĭ găh tơnŏk đak dơsĭ păng logistics. Tơ̆ hơnăp kơnh, pơjing tơdrong jang sơng đei lơ bơngai tơmơ̆t jên jang đơ̆ng apŭng plĕnh teh mơ̆t tơmơ̆t jên jang. Mưh dôm bơngai tơmơ̆t jên jang lơ, tih lơ̆m tơring, hơnih mơdro sa kơ đe sư gô pơjing, tơgop pơm tĕnh dôm hơnih jang kơmăy kơmŏk”.

Hăm trong vă jang tŭn pran jang tơbôl pơvih ăn hơtŏk tơiung kiơ̆ tơdrong Tơchơ̆t 59 - đơ̆ng Anih tơm Chính trị, kŭm hăm trong jang roi ‘năr roi kơchăng păng ‘lơ̆ng lơ̆m pơtrŭt tơmơ̆t jên jang, tĕch mơdro păng chă tơmang lăng, Khánh Hòa tŏk bŏk ƀrư̆ ƀrư̆ pơih să anih tĕch mơdro tơ̆ teh đak đe, sơng đei dơ̆ng jên jang apŭng plĕnh teh, pơm tơdrong ‘lơ̆ng vă tơring hơtŏk tơiung pran mŭk drăm đak dơsĭ păng pơvih pơvăn lơ̆m tơring Pơbăh Tŏk bŏk.