Tơ̆ jơ sơng, Thủ tướng Lê Minh Hưng lăp đon tơ̆ hơnăp tơdrong tơrek đơ̆ng khul tĕch mơdro kơ teh đak Mi hăm tơdrong jang xa, tĕch mơdro tơ̆ Việt Nam, năng ‘nâu jĭ tơdrong ‘lơ̆ng vă jang hơdoi mŭk drăm, tĕch mơ dro păng tơmât jên jang roi đunh roi ‘lơ̆ng đơ̆ng 2 teh đak. 

Pơma hơdăh đon pơhnŏng jang tok mŭk drăm hrĕnh mă lei athei kơjăp, iŏk đon pơhnŏng pơm hơtŏk tơdrong arih xa ăn kon pơlei pơm tơm, Thủ tướng ăn tơbăt Việt Nam akŏm jơhngâm hơmet kơjăp đon kơchăng bơ̆ jang kơdih păng tơplih trong jang tŏk ‘moi kiơ̆ khoa hŏk kơmăy kơmŏk, tơplih ‘nao rơgei păng tơplih hăm kơmăy sô̆.

Việt Nam pơkăp hơmet pơ ‘lơ̆ng rim tơdrong găn trong, hơmet ming trong pơgơ̆r jang păng tơdrong tơgŭm vă pơjing tơdrong ‘lơ̆ng hlŏh ăn dôm bơngai tơmât jên jang đơ̆ng teh đak đe, mă loi jĭ anih tĕch mơdro đơ̆ng teh đak Mi. Pơma hơdăh Mi jĭ teh đak jang hơdoi gĭt kăl, tơm dơnơm, Thủ tướng hơpơi ‘mĕh hơtŏk tơdrong pơvei jang hơdoi gĭt kăl tôm tơdrong Việt Nam-Mi đei yoa ‘lơ̆ng, yoa tơdrong đei yoa kơ kon pơlei păng anih tĕch mơdro kơ 2 teh đak, vang tơgop ăn tơdrong rơngei păng hơnŭk hơnoa tơ̆ tơring.