Tơ̆ 'măng tơƀơ̆p, Kơdră Kuô̆k hô̆i Trần Thanh Mẫn sơkơ̆t hơdah Việt Nam ling lang lăng Kazakhstan jĭ teh đak jang hơdoi kăp gĭt tơ̆ tơring Trung Á, atŭm hăm noh bơnê kơ sơnong jang roi năr roi tŏk kơ Kazakhstan lơ̆m apŭng plenh teh.

Gah jang hơdoi kuô̆k hô̆i, Kơdră Kuô̆k hô̆i Trần Thanh Mẫn pơtruh nơ̆r hăm 2 Kuô̆k hô̆i hơtŏk asong khul kơpal kơ Kuô̆k hô̆i, khul ngĭ sih sơnăm mơlôh, ngĭ sih drăkăn, rim hơnih jang kơ ƀar teh đak; pơma đam gah tơdrong hlôh vao lơ̆m pơm kiơ̆ pơkăp hơlen lăng, chih akŏm luơ̆t gah dôm tơdrong kăp gĭt kơ teh đak; hơtŏk pơma đam, tơgŭm păng jang hơdoi kơjăp lơ̆m dôm tơdrong hop akŏm ngĭ viê̆n apŭng plenh teh, lơ̆m tơring; pơtoi tơgŭm dih băl lơ̆m dôm tơdrong mă 2 pah atŭm tơrĕk truh.