Pơma dơnuh hơlăng, rơhâu hăm đe bơngai tang măt, Tổng Bí thư, Kơdră teh đak Tô Lâm khẳng định, lơ̆m dôm sơnăm âu ki, hăm tơdrong chĕp kơ̆l đơ̆ng Đảng, Teh đak, tơdrong mơ̆t jang hrơ̆ch đơ̆ng pơđĭ khŭl jang chĭnh trĭ, kŭm hăm tơdrong hơdrin đơ̆ng rim tơring păng kon pơlei, tơdrong jang chĕp vei păng tưk tơiung kơjă kăp gĭt joh ayŏ kơ dôm hơdrĕch kon kông hlôi iŏk đei lơ jơnei gĭt kăl, pơm tơplih ‘lơ̆ng pơđĭ găh đon hlôh vao păng tơdrong hơrih sa tơpôl. Gĭt kăl hloh, tơdrong jang chĕp vei joh ayŏ roi ‘năr roi tơklep kơjăp hăm tơpôl.

Tơ̆ hơnăp kơnh, Tổng Bí thư, Kơdră teh đak Tô Lâm athei păng ‘meh vă, đe ngê̆ nhơ̆n hơnơ̆ng pơtho ăn khŭl mơlôh, vă nơ̆r pơma, boa hơri brông, tơdrong jang joăt joe đei pơtrơp kơjung lơ̆m tơdrong hơrih sa hrei ‘nâu. Gơh tơroi oei đei nơ̆r pơma, oei đei tơdrong joăt, oei đei dôm boa hơri, hơsoang - ‘noh jĭ oei đei tơdrong tơm hơ hơdrĕch hơdrŭng; hơdai hăm ‘noh, kăl bơngơ̆t truh pơm tơdrong hiôk vă joh ayŏ đei jang kiơ̆ lơ̆m tơdrong hơrih sa, đei hơnih vă chĕp vei păng păr ang, vă rim kon pơlei, rim tơpôl tơpă jing tơ ‘ngla kơ tơdrong chĕp vei păng tưk tơiung joh ayŏ.