Anih vei lăng kon pơlei dêh char Gia Lai ‘nao pơgơ̆r hop akŏm hơmet pơ ‘lơ̆ng dôm tơdrong ƀơm truh tơdrong jang iŏk pơ ‘ngoăih teh Pơm trong gre kơdâu hrĕnh Quy Nhơn-Pleiku. Lơ tơdrong tơhlăk hơdăh hlôi đei lăng ƀôh, athei đei tơdrong hơdrin tôch kơ tih vă hơmet pơ ‘lơ̆ng, yak truh jang đang hơdrol kơ ‘năr 30/4 sơnăm ‘nâu. Găh dôm tơdrong tơhlăk, kơjă hrŭ ‘mong kiơ̆ tơdrong Tơchơ̆t 30/2025 đơ̆ng Anih vei lăng kon pơlei dêh char Gia Lai tŏ sĕt hloh anih tĕch mơdro, pơm pơmat tat lơ̆m krao hơvơn kon pơlei pơjao teh. Phŏ Kơdră Anih vei lăng kon pơlei dêh char Gia Lai Nguyễn Tự Công Hoàng athei rim tơring, anih jang tŭn hrĕnh iŏk pơ ‘ngoăih teh vei sơđơ̆ng rơđăh, ƀlep tơdrong hơgăt; hơdai hăm jăh hơmet ăn oei tơ̆ plei hle, hơdrin pơjao teh hơdrol kơ ‘năr 30/6, vei sơđơ̆ng tơdrong hiôk oei sa.

Tơdrong jang pơm trong gre kơdâu hrĕnh Quy Nhơn – Pleiku (dêh char Gia Lai) đei akŏm kơjung 125km, să 4 tong gre kơdâu, kơdâu hrĕnh 100km lơ̆m 1 jơ, năm brih 16 xăh, phường kơ dêh char Gia Lai. Đĭ đăng trong đei dang 4.789 ŭnh hnam kon pơlei đei ƀơm ưh kơ ‘lơ̆ng, lơ̆m noh dang 620 ŭnh hnam kon pơlei hơmet ăn oei tơ̆ plei hle, kŭm hăm 6.300 tơdrong jang, anih jang kăl ki thuơ̆t athei pôk rĭ.