Vang năm akŏm đei Thủ tướng Lê Minh Hưng, Kơdră Kuô̆k hô̆i Trần Thanh Mẫn păng Kơdră jang lơ̆m Ƀan Ƀĭ thư Trần Cẩm Tú. Tơdrong tơƀơ̆p tơƀôh hơdah tơdrong tơgŭm đơ̆ng Đảng, Teh đak hăm kon pơlei kon kông, sơkơ̆t hơdah sơnong jang roi năr roi kăp gĭt đơ̆ng bơngai kon kông jang tang măt ăn Kuô̆k hô̆i lơ̆m jơnŭm jang chĭnh trĭ. Pơma dơnuh hơ-iă hăm rim bơngai tang măt, Tổng Bí thư, Kơdră teh đak bơ̆n Tô Lâm sơkơ̆t hơdah, khei năr ou ki, tơdrong pơm jang đơ̆ng Kuô̆k hô̆i kiơ̆ dôm jăl jang pơtoi đei tơplih 'nao tơnăp hloh; tơdrong chih akŏm khôi luơ̆t đei hơtŏk 'lơ̆ng, hơlen lăng roi năr roi tơnăp, lơ̆m noh đei bơngai kon kông jang tang măt ăn Kuô̆k hô̆i roi năr roi sơkơ̆t hơdah sơnong jang po lơ̆m tơgŭm chih akŏm tơchơ̆t tơgŭm, pơm jang păng tơguăt đơ̆ng kuô̆k hô̆i hăm kon pơlei.

Vă pơtrŏ hăm tơchơ̆t hơtŏk tơ-iung lơ̆m jăl jang 'nao, Tổng Bí thư, Kơdră teh đak bơ̆n Tô Lâm akhan, pơtoi tơplih 'nao kăp gĭt lơ̆m trong jang tơgŭm kon kông, tơdrong tơm noh ưh hơdrô̆ tơgŭm, mă athei tơplih kơtang vă hiôk hơtŏk tơ-iung, pơm trong hiôk vă kon pơlei hơtŏk tơ-iung. Tơchơ̆t ưh hơdrô̆ pơdơh ah tơjur hin dơnuh, mă athei hơtŏk iŏk yua, tơplih tơdrong hơrih kơjăp sơđơ̆ng, pơm kơđeh tơdrong hơtŏk tơ-iung păng vei sơđơ̆ng tơdrong hơtŏ hơnơ̆ng tơpă. Lơ̆m tơdrong jang noh, rim bơngai kon kông jang tang măt ăn Kuô̆k hô̆i athei kơchăng tơroi hơdah dôm tơdrong tơhlăk tơhlĭn đei ƀôh tơ̆ tơring, tơlĕch dôm trong pơm jang trŏ ƀlep hloh hăm tơdrong đei ƀôh kơ rim tơring, rim hơdrung bơngai kon kông. Rim nơ̆r pơtruh athei iŏk đơ̆ng tơdrong đei ƀôh, tơguăt hăm tơdrong pơm jang păng tơdrong đei jơnei hơdah.