Akŏm jơhngâm pơm hơtŏk tơdrong ‘lơ̆ng ăn Khul jang tơ̆ tơring
Thứ tư, 09:19, 22/04/2026
VOV/Dơ̆ng tơblơ̆
VOV/Dơ̆ng tơblơ̆
VOV.Bahnar - Hơnơ̆ng bơ̆ jang lơ̆m hop akŏm ‘măng mă mônh, ‘năr 21-4, Quốc hội pơma nuh tơ̆ hnam hôp hơlen năng dôm tơdrong jang đei kiơ̆ trong jang atŏk tơiung mŭk drăm, tơpôl păng thu mong, tơlĕch jên jang kơ teh đak sơnăm 2025; tơdrong jang tŏk tơiung mŭk drăm, tơpôl păng thu mong, tơlĕch jên jang kơ teh đak dôm khei blŭng sơnăm 2026; Trong jang tŏk mŭk drăm, tơpôl 5 sơnăm 2026-2030; Tơdrong 'mơ 'met, tang găn pơhuach kư̆ kă sơnăm 2025; Tơdrong bơ̆ jang tơdrong jang tơm kơ teh đak găh hơtŏ băl kơplăh drŏ kăn hăm drŏ nglo sơnăm 2025.
Pơma hơdăh dôm tơdrong nol hăm tơdrong jang mŭk drăm, dôm bơngai tang măt Quốc hội tơlĕch lơ trong nhen mong akŏm, iŏk yoa mă 'lơ̆ng jên jang, pơgơ̆r bơ̆ jang mă rơđăh 'lơ̆ng, tơdra adrol, khŏm kăt tơjur dôm tơdrong jang ưh 'lơ̆ng…
Dôm bơngai tang măt lăp đon hăm trong jang đơ̆ng Khul kơdră teh đak, chih hơdăh sơnăm 2026 jĭ sơnăm pơm hơtŏk tơdrong ‘lơ̆ng ăn khul kăn ƀô̆ tơ̆ tơring. Kăn ƀô̆ bơngai jang ăn teh đak tơ̆ xăh đei hơnăp jang păng tơdrong jang tiôch lơ. Yoa thoi noh, athei đei trong pơtho pơhrăm ming dơ̆ng vă pơm lăp hăm tơdrong 'mĕh vă. Dôm bơngai tang măt kŭm tơrek truh tơdrong hơtŏ băl kơplăh drŏ kăn hăm drŏ nglo, năng 'nâu jĭ tơdrong gĭt kăl vă gơ̆h jang tŏk pran kơjăp, iŏk kon bơngai pơm tơm.
Viết bình luận