Hlŏh 7 sơnăm tơlĕch tơdrong tơchơ̆t 36, Anih chĕp kơ̆l Đảng dêh char Đắk Lắk tơlĕch 7 tơdrong jang, chih hơdăh 6 tơdrong kăl jang tŏk; Anih vei lăng kon pơlei dêh char păng dôm Anih jang kơpal tơlĕch lơ trong jang, hla ar pơtho, dar deh hơmet pơ ‘lơ̆ng trong pơgơ̆r jang tŏk mŭk drăm đak dơsĭ.

Ƀok Lương Nguyễn Minh Triết, Bí thư Đảng dêh char Đắk Lắk athei tơ̆ hơnăp kơnh, jơ̆p lơ̆m dêh char adrin tơplih đơ̆ng “rôp yâu” jing “jang mŭk drăm tơ̆ đak dơsĭ kơjăp ‘lơ̆ng”, iŏk vei lăng cham char đak dơsĭ pơm tơm. Lơ̆m noh, pơ ‘nhŏ hơmet pơ ‘lơ̆ng, plĕh hŭt lê̆ “the jơk” IUU, vei lăng ‘lơ̆ng rim ƀato, chih hơdăh tơring jang đei ka, pơjing tơdrong jang ka ‘lơ̆ng hơiă, mât hơdai hăm apŭng plenh teh.

Bí thư Đảng dêh char Đắk Lắk pơma hơdăh, dôm tơdrong jang mŭk drăm tơm tơ̆ đak dơsĭ mă dêh char vă akŏm jơhngâm jang tŏk, nhen chă  tơmang lăng ‘lơ̆ng tơ̆ đak dơsĭ; kơmăy kơmŏk pơm tơlĕch tơmam, tĕch mơdro ka hơdang tơ̆ teh đak đe; logistics tơ̆ đak dơsĭ, tơnŏk duk, unh hơyuh rơgŏh tơ̆ đak dơsĭ. Tơdrong kăl pơma ‘nŏh jĭ trong jang tŏk hơyơ kŭm tơklep kơjăp hăm tơdrong juăt păng vei lăng ‘lơ̆ng cham char ngăl.