VOV4.Bahnar - Năr 6/9, Dơnŏ anĭh chĕp pơgơ̆r tang găn jĭ Covid-19 dêh char Lâm Đồng hlôi chĭh pơtrŭh hla bơar găh pơdơ̆h jang kiơ̆ ăn oei hơtăih dĭh băl kiơ̆ nơ̆r athei jang kiơ̆ 16 hăm 2 tơring kơ pơlei tơm Đà Lạt lăp đơ̆ng rŏng hơnĭh jĭ hơbŭh đơ̆ng Kŏng ty dui brai Đà Lạt hlôi tang găn kĕ.

2 tơring Xuân Trường păng Trạm Hành kơ pơlei tơm Đà Lạt hơnơ̆ng jang kiơ̆ oei hơtăih dĭh băl kiơ̆ nơ̆r athei jang kiơ̆ 15

Hơdrol kơ ‘nŏh, dêh char Lâm Đồng ƀô̆h 2 ‘nu bơngai tơpŏh jĭ Covid-19 ‘nŏh kŏng nhân kơ Kŏng ty dui brai Đà Lạt tơ̆ tơring Trạm Hành, đơ̆ng rŏng ‘nŏh jĭ hơbŭh tơpŏh năm tơ̆ kon pơlei. Dêh char Lâm Đồng hlôi tơlĕch tơdrong tơchơ̆t jang kiơ̆ ăn oei hơtăih dĭh băl kiơ̆ Nơ̆r athei jang kiơ̆ 16 hăm 2 tơring Xuân Trường păng Trạm Hành kơ Đà Lạt, adoi akŏm khŭl bơ̆ jang năm tơchă dôm bơngai oei tơ jê̆, khăm hơlen, ăn oei hơdrô̆, tang găn jĭ. Đơ̆ng rŏng hlŏh 1 khei kơrŭn jơhngơ̆m tơlĕch jang kiơ̆ lơ trong jang, trŭh dang ei, hơnĭh jĭ hơbŭh au hlôi tang găn kĕ, hăm đĭ đăng hlŏh 150 ‘nu bơngai ƀơm trŭh đei ƀô̆h tơpŏh jĭ. Jô̆ trŭh ‘năr dơ̆ng năr 6/9, Lâm Đồng đei 258 ‘nu bơngai tơpŏh jĭ Covid-19, lơ̆m au pơlei tơm Đà Lạt ‘nŏh dơ̆ng hơlau hăm 157 ‘nu bơngai tơpŏh jĭ.

Tơblơ̆ nơ̆r: Amazưt