Tŏk bŏk ƀlưch ƀlach kơ đak, achon đak dơsĭ Phú Quý (dêh char Lâm Đồng) đei ƀôh nhen 1 găr tơmŏng đơ̆ng yang chă pơm. Lĕch hơtăih tơdrong hơrih hăt hot, bơngơ̆t tôm tĕch đơ̆ng Anih tơm Hà Nội, mŏ Ngô Thị Hồng Ánh tơchă truh hăm tŏ, kial păng tơdrong tơpăt đơ̆ng kon bơngai đak dơsĭ, achon đak dơsĭ tơ̆ Phú Quý. ‘Nâu ưh kơsĭ jing ‘măng mă blŭng sư năm truh tơ̆ achon ‘lơ̆ng rŏ âu, mă lei tơdrong ‘mêm đơ̆ng teh, tơdrong hơiă đơ̆ng bơngai tơring Gĭt kăl Phú Quý oei pơm ăn kơ sư nhen tơƀơ̆p dơ̆ng 1 ‘nu bơngai buăl so ‘mêm kơ eng. Dôm năr năm chă ngôi tơ̆ tŏk bŏk đak dơsĭ ‘noh jĭ dôm năr mŏ Ánh đei tơmơ̆t hơkâu lơ̆m tơdrong hiôk păng tơdrong ‘lơ̆ng rŏ đơ̆ng đak dơsĭ, achon đak dơsĭ.

 “Ĭnh ƀôh năm chă tơmang lăng Phú Quý hơnhăk ăn dôm tơdrong lăng vă kơ băt tôch kơ hơiă. Kon pơlei tơ̆ âu tôch kơ lăng kăl vei lăng cham char, rim bơngai kŭm tôch kơ rơhâu hăm tơmoi. Kơjă răt tơmam tơ̆ Phú Quý tôch kơ trŏ lăp ưh kơ đei măk kiơ. Dôm tơdỏng chă lăng vă kơbăt hăm Phú Quý đơ̆ng ‘măng hơdrol ĭnh truh tơ̆ âu truh ‘măng ‘nâu oei hơnhăk ăn dôm hơiă tôch kơ ‘lơ̆ng”.

Đơ̆ng rŏng kơ tơmơ̆t hơdai, dêh char Lâm Đồng ‘nao hăm hơnih đei pơđĭ hloi Đắk Nông păng Bình Thuận so hlôi pơih ăn 1 tơdrong hơmĕng hơtŏk tơiung să tih. Dang ei, tơmoi chă tơmang lăng găh năm chă lăng 1 gơlang gĭt kăl: Đà Lạt – rơbâu pơkao “Châu Âu tŏk bŏk tơring nhiệt đới”; Mũi Né – “găr tơmŏng kăp gĭt kơ chă tơmang lăng đak dơsĭ Đông Nam Á” păng Tà Đùng – “Ving Hạ Long tơ̆ groi kông”. ‘Nhŏng Lê Văn Thức, Kơdră vei lăng 1 kŏng ti chă tơmang lăng tơ̆ Đà Lạt tơroi, ‘nâu gô jing tơdrong chă tơmang lăng ‘lơ̆ng, tơpă hơiă đơ̆ng bri kông ƀơm truh đak dơsĭ ‘lơ̆ng rŏ.

“Ĭnh lui ‘noh jĭ trong nơnăm tơ̆ hơnăp kơnh gô đei pơm đang tơƀưh đơ̆ng Đà Lạt jur tơ̆ Mũi Né, đơ̆ng Đà Lạt năm tơ̆ Gia Nghĩa dăh mă Tà Đùng jing 1 gơnang thoi noh tôch kơ hơiă”.

Kŭm hăm Lâm Đồng, tơdrong hơiă đơ̆ng chă tơmang lăng kŭm păr ang truh bri kông Đắk Lắk. Tŏk bŏk tơring tơmam ‘lơ̆ng rŏ, hơnih khei ‘năr nhen pơdơh lê̆ lơ̆m re jơva chĭng tŏk bŏk bri kông, tơdrong rơhâu hiôk đơ̆ng kon bơngai păng dôm tơdrong ‘lơ̆ng hơdrô̆ kơ tơring teh âu hlôi tơpă ƀơm truh plei nuih kơ dôm tơmoi chă tơmang lăng tơring hơtăih. ‘Măng mă blŭng joă jơ̆ng tơ̆ groi teh gôh bazan, ƀok Nguyễn Văn Minh, tơmoi chă tơmang lăng truh đơ̆ng pơlei tơm Đà Nẵng tôch lăp đon hăm dôm kơjă kăp gĭt joh ayŏ ‘lơ̆ng hơiă kơ Đắk Lắk:

“Tơdrong tôn chĭng chêng tôch kơ hơiă păng tơdrô ge tơ̆ âu ‘noh et tôch kơ ‘lơ̆ng. ‘Nâu kŭm jing ‘măng mă blŭng ĭnh truh tơ̆ âu chă năm tơmang lăng, khŭl jang tôch kơ tơnăp dơ̆ng”.

Tơdrong tơm đơ̆ng tơdrong kăl lăng truh sơnăm ‘nâu ‘noh jĭ dêh char Gia Lai, tơring iŏk pơgơ̆r Sơnăm Chă tơmang lăng Teh đak 2026. Ƀok Phạm Anh Tuấn, Kơdră Anih vei lăng kon pơlei dêh char Gia Lai tơbăt, tơring tŏk bŏk hơdrin pơm ‘nao um rup hăm tơdrong jang hơdăh ‘lơ̆ng hơnơ̆ng, tơmơ̆t hơdai ‘lơ̆ng đơ̆ng tơdrong hơiă bri kông păng joh hơri hơsoang apŭng plĕnh teh ‘nao. ‘Nâu jĭ tơdrong ‘lơ̆ng vă Gia Lai yak tŏk, hơnhăk chă tơmang lăng jing tơdrong jang mŭk drăm tơm păng tơƀôh hơdăh hơnăn “groi kông ƀơm truh đak dơsĭ” lơ̆m hla kak chă tơmang lăng apŭng plĕnh teh.

“Dêh char Gia Lai pơkăp gô pơgơ̆r jơnei Sơnăm Chă tơmang lăng teh đak 2026 hăm tơdrong jang hơgei, sơđơ̆ng, hiôk, ‘lơ̆ng hơiă vă rim tơmoi chă tơmang lăng năm truh adoi ƀôh đei tơdrong tơpăt, pha păng kăl kơ ƀlŏk hơnơ̆ng”.

Đơ̆ng rŏng kơ tơmơ̆t hơdai bơ̆jang, dôm dêh char Tây Nguyên – tơ ter đak dơsĭ Nam Trung bộ đei 1 hơnih hơtŏk tơiung hơdrô̆, akŏm bri - đak dơsĭ - groi kông păng tơdrong ‘lơ̆ng joh ayŏ kơ rim hơdrĕch hơdrŭng. Đơ̆ng yan âu ‘noh, lơ anih mơdro sa tŏk bŏk bơ̆jang pơjing lơ tơmam chă tơmang lăng hơdai tơring, pơih să hơnih chă năm lăng ăn tơmoi. Ƀok Nguyễn Minh Trí, mĭnh anih mơdro sa găh chă tơmang lăng Đắk Lắk - Khánh Hoà tơroi:

“Mĭnh jăl trong gô đei dơ̆ng lơ hơnih truh hloh, jăl trong ‘noh đei đak dơsĭ hai, bri hai, joh ayŏ, tơmam sa hai. Gô hơdai đơ̆ng Đắk Lắk păng Khánh Hòa jing 1 tơmam ‘lơ̆ng tôm. Lơ̆m 3 năr, mưh tơmoi truh tơ̆ Khánh Hòa hum đak dơsĭ hai, gô drong năm tơ̆ păih hơlĕch Đắk Lắk chă lăng tơmo tơgol Nghênh Phong, tŏk tơ̆ Đắk Lắk chă lăng joh ayŏ, thong đak, bri kông, dơnâu đak, chơ kơi đak kơtăh”.

"Bri kông ƀơm truh đak dơsĭ ‘lơ̆ng rŏ” ưh khan lăp jing tơdrong tơgoăt hơdai găh teh, mă jing tơdrong tơmơ̆t hơdai đơ̆ng tơmam drăm kăl păng jơhngơ̆m đon hơiă. Mưh kon pơlei băt pơvei ‘lơ̆ng tơmo san hô, mưh khŭl kơdră tơring pơkăp tơdrong rơhâu hiôk păng gơh hơgei, ‘noh jĭ ƀơ̆t chă tơmang lăng tơpă jing tơdrong jang mŭk drăm tơm, kơjăp, pơm hơdăh hơnăn 1 Việt Nam ‘lơ̆ng rŏ păng ƀĕnh tơdrong hơiă.