Kăl kơ lăng truh ‘noh jĭ tơdrong jang pơm trong gre treng kơdâu hrĕnh Bắc – Nam năm klĕch dêh char hăm hơtăih vă jê̆ 192 km. Vă pơyua ăn iŏk pơ ‘ngoăih teh, dêh char Khánh Hòa tơchĕng hơdrol hơmet ăn 31 hơnih oei hle, ‘noh đei 13 hơnih đei hơdrol păng 18 hơnih pơjing ‘nao dăh mă pơih să, hăm akŏm jên hloh 1.700 ti hlak jên. Mă lei, kŭm hăm tơdrong jang âu, lơ tơdrong jang lơ̆m tơring kŭm tŏk bŏk tơƀơ̆p tơhlăk găh pơm hla ar păng dôm hơyak tơlĕch jang.

Lơ̆m kơplăh ‘noh, khŭl kang ƀô̆ hơnơ̆ng bơ̆jang hơnăp jang tơ̆ tơring oei ưh kơ măh păng tam mă pơm lăp hăm ‘meh vă. Tơ̆ hơnăp yan âu ‘nâu, dêh char hlôi hơvơn 78 ‘nu bơngai jang teh đak kơ dêh char năm tơgŭm tơring; hơdai hăm ăn phep kĭ hla ar joăt jang hăm dôm anih jang tơdrong jang teh đak mưh ưh kơ măh bơngai jang, vă tŭn hrĕnh iŏk pơ ‘ngoăih teh.