Pơyan phang 2025 – 2026 âu ki, tơdrong sir chă, pôi akŏm kơting linh lôch tang ăn teh đak đơ̆ng Việt Nam lôch tơ̆ Campuchia lơ̆m dôm tơdrong tơblăh sơ̆ đei 2 păh vang jang hơdoi, pơgơ̆r bơ̆ jang ‘lơ̆ng kiơ̆ hla ar pơkăp bơ̆ jang lơ̆m rim sơnăm. Tơdrong jang hơdoi, pơma nuh, sek tơlang dôm tơdrong đei ƀơm truh đei bơ̆ jang kơjăp ‘lơ̆ng.

Hăm tơdrong adrin ưh đei pơdơ̆h đơ̆ng Khul K51 (Anih chĕp kơ̆l pơgơ̆r khul linh dêh char Đắk Lắk) păng tơdrong tơrek, tơgŭm đơ̆ng khul kơdră pơgơ̆r păng dôm anih jang kơpal kơ dêh char Mondulkiri hơtŏk tơdrong tơroi tơbăt, pơtruh khul jang tơgŭm tơ̆ dôm tơring, truh dang ei hlôi sir akŏm đei 22 kơ̆l linh lôch tang ăn teh đak đơ̆ng Việt Nam (tam mă băt hơdăh hơnăn).

Ƀar Anih pơgơ̆r jang pơma nuh, drơ̆ng nơ̆r pơgơ̆r soi plang, pơjao păng chơ kơting linh lôch tang ăn teh đak vih tơ̆ dêh char Đắk Lắk vă pơgơ̆r lơ̆m ‘năr 27/5, kiơ̆ tơdrong juăt soi sơmăh păng tơdrong juăt đơ̆ng teh đak Campuchia. 2 păh oei drơ̆ng nơ̆r ăn dôm tơdrong đei ƀơm truh tơdrong sir chă, pôi akŏm kơting linh lôch tang ăn teh đak lơ̆m khei ‘năr đơ̆ng rŏng dơ̆ng./.