Pơma ah 'măng Pơma đam, Thủ tướng Lê Minh Hưng ră hơdah, tơbôl Việt Nam - Hàn Quốc dang ei ưh hơdrô̆ pơdơh ah jang hơdoi tĕch pơdro dah mă asong jang mă tơplih ah minh jăl jang kơjung hloh, jăl jang hơdoi tôm tơdrong, atŭm vang jang păng atŭm pơjing đei kơjă kăp gĭt 'nao tơ̆ tơring păng lơ̆m kơpal teh. Thủ tướng hơpơi 'meh rim hơnih jang mŭk drăm kơ 2 teh đak gô pơma đam tơpăt jue, tơlĕch jang hơdah, atŭm hăm Jơnŭm pơgơ̆r kơ 2 teh đak pơklaih dôm hơnih tơhlăk păng pơih trong jang hơdoi 'nao.

Kơdră teh đak Hàn Quốc Lee Jae Myung akhan, ah mă tơdrong jang mŭk drăm lơ̆m kơpal teh ưh đei sơđơ̆ng, jang hơdoi mŭk drăm kơ 2 teh đak Hàn Quốc păng Việt Nam roi năr roi kăp gĭt hloh kơ layơ, atŭm băl keh đang tơchơ̆t jang kŏng ngĭp khei năr hơnô̆ hơnăp kơnh, pơjing jơhngơ̆m pran ăn hơtŏk tơ-iung. Tơchơ̆t tơmam tĕch răt kơ 2 teh đak ah sơnăm 2025 hlôi đei jơnei 94,6 tih đôlar, ƀok Kơdră lui ngeh pơtoi pơih să tơdrong jang tĕch pơdro, asong jang păng gơh đei jơnei 'nao noh 150 tih đôlar ah sơnăm 2030.