Vă hơmet ming tơdrong ‘nâu, Anih vei lăng kon pơlei dêh char Đắk Lắk hôp hơlen năng tơdrong tơlĕch jên păng hơmet pơ ‘lơ̆ng dôm tơdrong pơmat tat mưh bơ̆ jang dôm tơdrong yoa Anih vei lăng tơdrong tơmât jên jang ming man anih pơyoa ăn kon pơlei păng jang kơmăy dêh char pơm tơ ‘ngla tơmât jên jang. Anih âu đei pơjao lơ tơdrong jang mă lei ‘nao tơlĕch lăp 10% jên jang. Sơnăm 2026 Anih đei pơjao vei lăng 33 tơdrong jang, hăm jên jang hlŏh 917 ti. Mă lei tơdrong tơlĕch jên jang oei tôch hiơ̆.

Lơ tơdrong jang man anih jang, pơm trong tơ̆ Anih chă tơmang lăng Dơnâu Lắk, trong gre N6, trong Nguyễn Đình Chiểu tơtrơp dơ̆ng, anih jang tơ̆ Tơring ạng kơmăy Hòa Phú… oei tơƀâp pơmat tat găh tơdrong hrŭ ‘mong jên teh ngăl, tam mă iŏk đei tơdrong drơ̆ng nơ̆r hăm kon pơlei. 1,2 tơdrong jang oei tơhlăk kăl hơmet ming trong jang, ưh kơmăh jên jang mă ưh ‘nŏh tam mă đei tơlĕch jên jang. Tơ̆ hop akŏm, lơ nơ̆r pơma ƀơm truh tơdrong athei klăih song hơdăh tơdrong jang păng sek tơlang keh rim tơdrong oei tơhlăk, lê̆ kơ tơrăih, pơdui đunh tơdrong jang kiơ. Hăm dôm tơdrong jang ưh jăh tơlĕch jên, ƀok Đỗ Hữu Huy, Kơdră vei lăng kon pơlei dêh char Đắk Lắk athei bơ̆ jang mă hrĕnh, vei lăng ‘lơ̆ng tơdrong hơgăt tơlĕch jên jang đơ̆ng teh đak. Mưh ƀôh kăl athei pơtruh jên jang mă hrôih vă gơ̆h tơlĕch jên jang lăp ‘lơ̆ng.