Adrol kơ pơtôch hop akŏm, Quốc hội pơdrơ̆ng nơ̆r yơ̆r ti ăn lơ tơdrong tơchơ̆t gĭt kăl. ‘Nŏh jĭ tơdrong tơchơ̆t găh jên thu mong, tơlĕch jang kơ teh đak sơnăm 2024; Tơdrong tơchơ̆t găh Tơdrong kang dăr lăng đơ̆ng Quốc hội sơnăm 2027; Tơdrong tơchơ̆t găh pơjing Khul jang dăr lăng kơ Quốc hội sơnăm 2027; Tơdrong tơchơ̆t đơ̆ng Quốc hội găh atŏk tơiung tơdrong joh ayŏ kơ dŏ xoang Việt Nam; Tơdrong tơchơ̆t găh trong vă jang tŏk mŭk drăm, tơpôl 05 sơnăm đơ̆ng 2026 – 2030; Tơdrong tơchơ̆t găh trong tơmât jên jang đơ̆ng teh đak đunh păh lăp đơ̆ng 2026 – 2030;

Tơdrong tơchơ̆t găh trong pơgơ̆r jang, tơdrong tơgŭm vă sek tơlang dôm tơdrong glăi găh teh đơ̆ng anih jang, rim bơngai đei adrol lơ Luơ̆t teh sơnăm 2024 đei yoa păng trong jang vă hơnơ̆ng hơmet pơ ‘lơ̆ng pơmat tat, tơhlăk tăk ăn dôm tơdrong jang oei tơhlăk đunh. Quốc hội drơ̆ng nơ̆r ăn Luơ̆t hơmet ming, chih tơmât dơ̆ng 1,2 tơdrong lơ̆m Luơ̆t thuê̆ jên khei lơ hăm rim bơngai, Luơ̆t Thuê̆ hơtŏk kơjă tơmam, Luơ̆t Thuê̆ jang xa đei iŏk yoa lơ hăm Anih tĕch mơdro păng Luơ̆t Thuê̆ răt yoa tơmam gĭt kăl.