VOV4.Bahnar - Đơ̆ng jăl 2/2020 trŭh dang ei, tơdrong jang ba dôm bơngai jang năm jang tơ̆ tĕh đak đe ‘nŏh mĭnh lơ̆m dôm tơdrong đei ƀơm ư̆h kơ kơnê̆ kơtang kơ yuơ jĭ hơbŭh Covid-19 pơm ăn, lăp dơ̆ng đơ̆ng rŏng hơnĭh jang gre păr, hơnĭh hnam oei tĭh, hơnĭh tơmang pơ hiơ̆. Kiơ̆ đơ̆ng Hơnĭh vei lăng bơngai jang tơ̆ tĕh đak đe găh Dơnŏ anĭh tơm vei lăng Tơdrong jang, Bơngai rơka păng tơpôl, hla bơar chĭh tơbăt đơ̆ng rim hơnih jang mơdro sa tơbăt: Lơ̆m 4 khei au ki, akŏp măt bơngai jang kơ Việt Nam năm jang tơ tĕh đak đe vă jê̆ 35.000 ‘nu bơngai, jơnei vă jê̆ 38% pơtêng hăm trong tơlĕch jang lơ̆m sơnăm. Tơ̆ tĕh đak Nhật Bản hơnơ̆ng sơng đei lơ bơngai jang Vệt Nam hăm vă jê̆ 18.400 ‘nu bơngai; đơ̆ng rŏng ‘nŏh tơ̆ Đài Loan (Trung Quốc) hlŏh 15.000 ‘nu bơngai jang, Hàn Quốc hlŏh 280 ‘nu bơngai jang, Hungary hlŏh 200 ‘nu bơngai pang păng rim tĕh đak anai. Hơdrô̆ lơ̆m khei 4, akŏp măt bơngai năm jang tơ̆ tĕh đak đe ‘nŏh hlŏh 5.300 ‘nu bơngai. Tơdra hơdrol, tơdrong ba bơngai jang năm jang tơ̆ tĕh đak đe hơnơ̆ng tơ ƀơ̆p tơnap tap kơ yuơ jĭ hơbŭh Covid-19.

Tơblơ̆ nơ̆r: Amazưt