VOV4.Bahnar - Pơ gê ‘năr 27/4, Jơ nŭm pơ gơ̆r kon pơ lei dêh char Dak Nông jăl III, jăl jang 2016 - 2021 hlôi pơ gơ̆r ‘Măng hop akŏm tơ drong jang kĭ ăn trong jang tơ mơ̆t jên jang rim tơ drong jang tơ mơ̆t jên jang teh đak jăl jang 2022-2025 păng jang kiơ̆ tơ drong jang rơ̆ih bơ ngai jang. Tơ̆ ‘măng hop akŏm, Jơ nŭm pơ gơ̆r kon pơ lei dêh char Dak Nông hlôi pơ ma dơ nuh păng drơ̆ng lăp hăm rim hla ar tơ chơ̆t kĭ ăn trong jang tơ mơ̆t jên jang rim tơ drong jang tơ mơ̆t jên jang teh đak jăl jang 2022-2025. Kiơ̆ kơ ‘noh, akŏp tơ chĕng hơ drol jên tơ mơ̆t jang teh đak jăl jang âu ‘noh hloh 11.700 ti hlak jên, hloh 1 puăt ‘măng pơ têng hăm jăl jang hơ drol.

Jơ nŭm vei lăng kon pơ lei dêh char Dak Nông pơ drơ̆ng tơ drong tơ chơ̆t tơ mơ̆t jên jang teh đak jăl jang 2021-2025

Tơ chĕng hơ drol lơ̆m 5 sơ năm truh Dak Nông gô tơ mơ̆t jên jang hloh 170 tơ drong jang, tơm ‘noh jĭ pơm hơ met rim trong gre dêh char, trong nơ năm anih akŏm; tơ mơ̆t jên jang pơ jing khŭl kơ dră điện tử păng anih kơ drơ̆m hơ gei... Kŭm tơ̆ ‘măng hop akŏm, Jơ nŭm pơ gơ̆r kon pơ lei hlôi akŏm pơ ma dơ nuh tơ drong jang hơ tŏk tơ iung mŭk drăm năm hơ dai hăm vei sơ đơ̆ng tơ drong arih sa tơ pôl, tang găn jĭ hơ buh, hơ dai hăm ‘noh hơ tŏk loi dơ̆ng vei lăng tơ mam drăm păng vei lăng cham char. Rim bơ ngai tang măt kŭm hlôi pơ drơ̆ng kiơ̆ hla ar tơ roi găh tơ drong tơ mơ̆t dơ̆ng kơ chư̆k jang pơm bơ ngai jang lơ̆m Anih vei lăng kon pơ lei hăm ƀok Trần Văn Diêu, Chánh văn phòng Anih vei lăng kon pơ lei dêh char Dak Nông.

Thuem: Tơ blơ̆