VOV4.Bahnar - Atŏk kơtang hơnăp jang kơ Hơnĭh mong jên mơdro sa tơm dơnơm lơ̆m jang kiơ̆ tơdrong jang jên hu, tơmơ̆t jên jang atŏk tơ iung chŏh jang sa, tơring chŏh jang sa, đơ̆ng sơnăm 2020 trŭh dang ei, Agribank hlôi ‘măn hlŏh 1.000 ti hlak jên jang sa đei vă tơjur jên chĕh ăn tŏk iŏk tơgŭm tơmoi yak hlŏh jĭ hơbŭh Covid-19, adoi tơlĕch lơ tơdrong jang ăn tŏk iŏk tơgŭm djru, jên chĕh tŏ sĕt đơ̆ng 2% - 2,5% pơtêng hăm jên chĕh tŏk iŏk hmă hăm kon jên hlŏh 300.000 ti hlak jên ăn tơmoi hơnĭh mơdro sa păh ai păng iĕ, tơmoi tŏk iŏk lơ, tơmoi rim bơngai păng hơnĭh mơdro sa FDI.

            Tơ̆ hơnăp jĭ hơbŭh Covid-19 pơrăm kơtang pơm kơnê̆ kơtang trŭh tơdrong erĭh sa, mŭk drăm, tơpôl; vă tơtom tơgŭm ăn tơmoi tŏk iŏk kon jên hrô̆ih pơm sơđơ̆ng mơdro sa, yak hlŏh tơnap tap, Agribank tơlĕch jang tơjur jên chĕh tŏk iŏk hăm tơmoi rim bơngai păng chă tŏk iŏk jên hăm jên tĕh đak bơ̆n tơ̆ Agribank.

            Mă hơdăh, hăm kon jên tŏk iŏk lơ̆m khei ‘năr 15/07/2021, Agribank hơnơ̆ng tơjur dơ̆ng 10%  pơtêng hăm jên chĕh ăn tŏk iŏk tŏk bŏk đei pơlăp hăm tơdrong tŏk iŏk hơdrol kơ đĕh năr đơ̆ng 5%/sơnăm năm tơ̆ lơ păng jên tŏk iŏk oei hre đunh păh ai, đunh khei ‘năr đei jên chĕh đơ̆ng 7%/sơnăm năm tơ̆ lơ. Tơchĕng hơlau, hăm tơdrong hơnơ̆ng tơjur jên chĕh ‘măng mă au, Agribank ‘măn dang 5.500 ti hlak jên vă tơgŭm ăn tơmoi.

            ‘Ngoăih kơ ‘nŏh, Agribank jei hơdron hơmet pơ ‘lơ̆ng tơnap tap ăn tơmoi lơ̆m tơdrong pơm kiơ̆ kơ jăp, jơnei rim trong jang tơgŭm djru nhen: Hơmet pơ ‘lơ̆ng gre so păng jên chĕh; Ư̆h kơ iok jên mư̆h pơtrŭh jên lơ̆m tĕh đak păng tơgŭm ăn hloh 130 ti hlak jên ăn bơ̆ jang tang găn jĭ Covid-19;.…Lơ lŏh, hăm tơdrong hơnơ̆ng tơjur jên chĕh ăn tŏk iŏk, ‘măng mă 5 hơnơ̆ng tơbăt hơdăh hơnăp jang pơm jŭk yŭk trong hơlau, iung jang kơtang hlŏh đơ̆ng Agribank lơ̆m tơdrong vang iung jang hơdoi hăm Đảng, Tĕh đak, Khŭl kơdră Tĕh đak jang kiơ̆ “trong jang ting ring”: Tơpŭh hŭt jĭ hơbŭh păng atŏk tơ iung mŭk drăm. Tơdrong jang tơjur jên chĕh ăn tŏk iŏk đei pơđunh khei ‘năr trŭh đĭ năr 31/12/2021 păng đei tơlĕch jang kiơ̆ kơtang tơ̆ 2.300 hơnĭh bơ̆ jang kơ Agribank lơ̆m tĕh đak bơ̆n.

Tơblơ̆ nơ̆r: Amazưt