VOV4.Bahnar - Pơ gê ‘năr 20/8, Khŭl jang chĕp kơ̆l pơ gơ̆r Anih jang Mặt trận Tổ quốc Việt Nam pơ lei tơm Hồ Chí Minh hlôi pơ gơ̆r sơng iŏk kơ măy ECMO đei kơ jă 145.000 đô lar Mi, yua đơ̆ng Kơ dră anih tang măt Ấn Độ păng tơ pôl bơ ngai Ấn Độ tơ̆ tơ ring pơ băh pơ jao asong kơ Hnam pơ gang jĭ Nhiệt đới pơ lei tơm Hồ Chí Minh. Yă Tô Thị Bích Châu, Kơ dră Anih jang Mặt trận Tổ quốc Việt Nam pơ lei tơm tơ ƀôh đon vang tơ gŭm hăm dôm tơ drong mơ mat tat păng ơh sơ ‘ngon mă kon pơ lei Ấn Độ hlôi athei yak hloh yua đơ̆ng tơ drong jĭ Covid-19 ‘măng mă 2; hơ dai hăm ‘noh lăng ‘lơ̆ng tơ drong jơ nei đơ̆ng Khŭl kơ dră teh đak păng kon pơ lei Ấn Độ lơ̆m tơ drong vei lăng jĭ hơ buh Covid-19. Mă đơ̆ng oei tơ ƀơ̆p lơ mơ mat tat, mă lei Khŭl kơ dră teh đak Ấn Độ hlôi tơ chơ̆t tơ gŭm Khŭl kơ dră teh đak păng kon pơ lei Việt Nam tŏk bŏk tơ jră hăm dôm tơ drong đei ƀôh krê hơ mơt đơ̆ng jĭ hơ buh, jĭ 1 tơ drong jang tôch kơ ‘lơ̆ng. Kơ dră tang măt Ấn Độ tơ̆ pơ lei tơm Hồ Chí Minh - ƀok Madan Mohan Sethi tơ băt, tơ chĕng hơ drol ‘năr 30/8 truh âu, duk linh đak dơ sĭ Ấn Độ gô truh tơ̆ tơ nŏk đak dơ sĭ tơ̆ pơ lei tơm Hồ Chí Minh, joăt chơ 300 kơ măy pơm oxy păng 100 tấn oxy pơ gang kơ loăi đak yua đơ̆ng Khŭl kơ dră teh đak Ấn Độ tơ gŭm ăn Việt Nam.

            Thuem: Tơ blơ̆