VOV4.Bahnar - Pơ gê ‘năr 14/10, Anih chĕp kơ̆l pơ gơ̆r Đảng bộ pơ lei tơm Hồ Chí Minh pơ gơ̆r Hop akŏm ‘măng mă 9. Pơ ma pơ gơ̆r blŭng a, ƀok Nguyễn Văn Nên – Bơ ngai jang lơ̆m Anih tơm Chĭnh trĭ, Bí thư Đảng pơ lei tơm tơ băt, lơ̆m 9 khei sơ năm 2021, tơ drong jĭ hơ buh đei ƀôh tôch kơ tang, pơ lei tơm athei tơ mơ̆t yua ưh kơ ăn yak vih vơ̆t lơ̆m tơ pôl lơ̆m khei ‘năr đunh. Tơ drong ‘nâu ƀơm ưh kơ ‘lơ̆ng kơ tang truh mŭk drăm păng joh ayŏ, tơ pôl kơ pơ lei tơm. Vă đĭ đăng tơ drong jang đei ƀơm ưh kơ ‘lơ̆ng, lơ kơ sô̆ đei tơ jur, lơ̆m noh GRDP 9 khei jur 4,98%.

Anih chĕp kơ̆l pơ gơ̆r Đảng bộ pơ lei tơm Hồ Chí Minh pơ gơ̆r Hop akŏm ‘măng mă 9

Truh dang ei pơ lei tơm Hồ Chí Minh hlôi vei lăng đei jĭ hơ buh. Mă lei, pơ lei tơm athei hơ nơ̆ng hơ drin hloh dơ̆ng vă jang kiơ̆ tơ drong tơ chơ̆t 128 đơ̆ng khŭl kơ dră teh đak păng pơ tho đơ̆ng Anih tơm vei lăng găh jang pơ gang găh trong jang pơ gia pơm lăp sơ đơ̆ng, ‘lơ̆ng, vei lăng đei yua jĭ COVID-19. Âu ki, kơ dră teh đak Nguyễn Xuân Phúc hlôi đei lăng ‘lơ̆ng tơ drong hơ drin lơ̆m tơ drong jang tang găn jĭ păng tơ roi ăn dôm tơ drong kăl tơ iung ming tơ̆ hơ năp kơnh.

Thuem: Tơ blơ̆