VOV4.Bahnar - Lơ̆m kơ sơ̆ ‘năr 27/4, hăm tơ drong pơ gơ̆r đơ̆ng kơ dră Kuôk hô̆i Vương Đình Huệ, Anih chĕp kơ̆l pơ gơ̆r Kuôk hô̆i hlôi yơ̆r ti pơ drơ̆ng kiơ̆ athei đơ̆ng Khŭl kơ dră  teh đak, ăn phep iŏk yua 12,1 rơ bâu ti hlak jên ‘mơ ‘met tơ lĕch đơ̆ng jên jang trung ương vă răt vắc xin tang găn jĭ Covid-19. Tơ drong iŏk yua jên âu vă răt vắc xin tang găn Covid-19 ‘noh jĭ kăl hloh, vei sơ đơ̆ng jang kiơ̆ trong jang tơ gŭm vei lăng sơ đơ̆ng tơ pôl kiơ̆ tơ drong hơ găt tơ̆ Luơ̆t jên jang teh đak. Khŭl kơ dră teh đak hlôi jô̆ hơ len rim kon jên păng jên pơ hoach  kŭm lăp păng đei tơ drong. Mă lei, Anih chĕp kơ̆l pơ gơ̆r Kuôk hô̆i kŭm tơ tă tơ gŭm ăn kơ rim tơ ring mơ mat tat lơ̆m pơm hơ tŏ jên jang mă lăp hăm tơ drong răt păng iŏk yua vắc xin. Pơ ma pơ tôch ‘măng hop akŏm mă 55, Kơ dră Kuôk hô̆i Vương Đình Huệ athei rim anih jang hơ met ăn hơ len dôm hla ar tơ roi tơ băt tơ̆ ‘măng hop akŏm mă mônh, Kuôk hô̆i jăl 15. Tơ chĕng hơ drol ‘Măng hop akŏm mă mônh, Kuôk hô̆i jăl 15 bơ̆ jang lơ̆m 11 năr; pơ gơ̆r lơ̆m ‘năr 20-7 păng pơ tôch lơ̆m ‘năr 03-8. Tơ̆ ‘măng hop akŏm âu, Kuôk hô̆i gô ‘măn lơ jơ năr set hơ len, tơ chơ̆t găh tơ drong jang rơ̆ih bơ ngai jang.

Thuem: Tơ blơ̆