VOV4.Bahnar - Pơ gê 13/7, tơ gop nơ̆r găh dôm trong jang atŏk tơ iung muk drăm, tơ pôl, trong tơ lĕch jên jang tĕh đak, trong tŏk iŏk, kla jên hre păng tơ trong tơ mât jên jang đơ̆ng tĕh đak đunh păh lăp đơ̆ng 2021-2025, Anih chĕp kơ̆l pơ gơ̆r Kuô̆k hô̆i drơ̆ng nơ̆r hăm trong jang đơ̆ng Khul kơ dră tĕh đak găh tơ lĕch jên jang tĕh đak lơ̆m dôm sơ năm ‘nâu, rŏ năng lơ ƀiơ̆ jăl adrol ki ‘nŏh 3,7% GDP.

Anih chĕp kơ̆l pơ gơ̆r Kuô̆k hô̆i akhan: Tơ drong jang mŭk drăm tam mă pran, jang tŏk tam mă kơ jăp. Ƀơm kơ nê̆ đơ̆ng tŏ ‘mi kial tơ plih, ‘mi kial hơ bŭt, đak ƀŏh mât pơm tơ lĕch lơ tơ drong hiong răm. Mă loi, jĭ Covid-19, kiơ̆ tơ drong tơ chĕng tam mă lăng ƀôh đĭ tơ drong mơ mat tat, tơ hlăk tăk đơ̆ng anih tĕch mơ dro păng kon pơ lei.

Phŏ Kơ dră Kuô̆k hô̆i Trần Thanh Mẫn athei hơ len năng mă dêh hlŏh dơ̆ng dôm tơ drong ƀơm kơ nê̆ truh tơ drong tơ lĕch jên jang, thu mong jên tĕh đak khei ‘năr âu ki, kăl loi ‘nŏh ƀơm kơ nê̆ đơ̆ng jĭ Covid-19. Mă loi tơ drong kla jên hre tĕh đak păng tơ lĕch jên jang lơ dêh hnang. Lơ̆m pơ gê 13/7 mơ̆n, Anih chĕp kơ̆l pơ gơ̆r Kuô̆k hô̆i tơ gop nơ̆r ăn Hla ar chih akŏm nơ̆r pơ ma, apinh đơ̆ng bơ ngai tăh hla lơ̆m tĕh đak gơih ăn hop akŏm mă 1, Kuô̆k hô̆i jăl 15.

Dơ̆ng: Tơ blơ̆