VOV4.Bahnar - Pơ ma dơ nuh lơ̆m Hla ar tơ roi tơ băt đơ̆ng Khŭl kơ dră teh đak găh pơ tôch jang kiơ̆ ‘mơ ‘met, tang găn brăh brư lơ̆m sơ năm 2020 tơ̆ jơ bơ̆ jang kơ sơ̆ ‘năr 27/5, rim nơ̆r tơ gop lơ̆m Anih chĕp kơ̆l pơ gơ̆r Kuôk hô̆i chih iŏk tơ drong hơ drin păng dôm jơ nei iŏk đei lơ̆m sơ năm 2020, mă loi ‘noh jĭ lơ̆m khei ‘năr tŏ ‘mi kial, jĭ hơ buh pơ răm. Mă đơ̆ng thoi noh ră, lơ tơ drong găh jang kiơ̆ ‘mơ ‘met, tơ jră brăh brư kŭm đei tơ lĕch ăn 1 trong tơ păt.

Kơ dră Kuôk hô̆i Vương Đình Huệ pơ ma tơ̆ jơ hop akŏm

Ăn tơ gop nơ̆r lơ̆m tơ drong ‘nâu, Kơ dră Kuôk hô̆i Vương Đình Huệ pơ ma hơ dăh, jang kiơ̆ ‘mơ ‘met, tang găn brăh brư ‘noh jĭ trong jang tôch kơ tih đơ̆ng Đảng, đei tơ chơ̆t lơ̆m khôi luơ̆t, hơ dai hăm hơ tŏk loi dơ̆ng iung jang tang găn sa pơ jĭp. Yua thoi noh, bơ̆n đei hloi Luơ̆t tang găn sa pơ jĭp păng Luơ̆t jang kiơ̆ ‘mơ ‘met, tang găn brăh brư, ư̆h khan lăp hơ găt tơ̆ hơ nih jang teh đak mă pơ đĭ hloi hơ nih jang pơ jing kơ dih. Tơ drong athei đơ̆ng Thủ tướng teh đak ‘noh athei rơ đăh, tơ păt, tơ drong kiơ ‘lơ̆ng ‘noh athei pôk pơ ư, tơ ring, anih jang hơ yơ ‘lơ̆ng, tơ drong jang hơ yơ hơ iă athei lang să, hơ nih hơ yơ pơm glăi, kơ kĕ tơ răn ‘noh athei akhan, ki luơ̆t.

Thuem: Tơ blơ̆