VOV4.Bahnar - Hơ nơ̆ng bơ̆ jang lơ̆m hop akŏm mă 57, pơ gê 15/6, tơ̆ Hnam Kuô̆k hô̆i, Anih chĕp kơ̆l pơ gơ̆r Kuô̆k hô̆i tơ gop nơ̆r găh hla ar chih tơ roi hơ len năng tơ drong jang đei kiơ̆ trong atŏk tơ iung mŭk drăm, tơ pôl păng thu mong, tơ lĕch jên jang tĕh đak 6 khei blŭng sơ năm păng dôm trong vă jang atŏk tơ iung mŭk drăm – tơ pôl, thu mong, tơ lĕch jên jang kơ tĕh đak 6 khei hơ tuch sơ năm 2021. Kơ dră Kuô̆k hô̆i Vương Đình Huệ pơ gơ̆r hop akŏm. 

Lơ̆m hop akŏm, dôm bơ ngai jang lơ̆m Anih chĕp kơ̆l pơ gơ̆r akhan: Khul kơ dră tĕh đak athei vei lăng sơ đơ̆ng mŭk drăm lơ̆m tĕh đak, athei găn đei tơ drong kơ jă tơ mam tŏk păng vei lăng jên kon tŏ sĕt, jên tơ mât jang đơ̆ng tĕh đak athei jang mă trŏ tơ drong, vei lăng vei ‘lơ̆ng anih tơ mât jên jang xa, tĕch mơ dro, đei thoi nŏh mưh đĭ jĭ tơ drong jang mŭk drăm tĕh đak bơ̆n gơ̆h kĕ tŏk iung hrĕnh dơ̆ng.

Kiơ̆ hla ar chih tơ roi, 6 khei sơ năm 2021, tơ drong jang tŏk GDP pơ hlom dang 5,8%. Thu mong jên tĕh đak đei 55,5% kơ sô̆ hơ găt, tŏk 10,9% pơ têng hăm khei âu sơ năm 2020. Ƀât mă oei đei tơ drong jĭ Covid-19, dôm kơ sô̆ ăn ƀôh ‘lơ̆ng ngăl mă đơ̆ng tam mă jang đei lăp hăm dôm tơ drong hơ găt hlôi tơ lĕch ră. Tơ drong ưh gan hơ iă ‘nŏh dang 23% kơ sô̆ anih tĕch mơ dro pơ dơ̆h jang xa, tơ ƀôh hơ dăh kơ sư̆k tơ jră đơ̆ng dôm anih tĕch mơ dro hlôi jur yoa đơ̆ng jĭ.

Dơ̆ng: Tơ blơ̆