VOV4.Bahnar - Pơ gê ‘năr ( 10/6), Grŭp jang Phongsubthavy kơ Lào hlôi năm tơ̆ Anih jang tang măt Việt Nam tơ̆ Lào pơ jao asong pơ rŏ 1,2 tơ mam pơ gang păng jên đei kơ jă 1 triệu đô lar Mi tơ gŭm Khŭl kơ dră teh đak păng kon pơ lei Việt Nam tang găn jĭ hơ buh COVID-19. Tang măt Khŭl kơ dră teh đak păng kon pơ lei Việt Nam, Kơ dră tang măt Việt Nam tơ̆ Lào Nguyễn Bá Hùng hlôi sơng iŏk tơ mam đơ̆ng Grŭp jang Phongsubthavy, yua đơ̆ng ƀok Phongsavanh Senaphuan- Kơ dră Grŭp jang pơ jao asong.

‘Noh đei lơ tơ mam pơ gang đei kơ jă 500.000 đô lar Mi nhen 50.000 che gom pơ gang, 25.000 kơ chai đak ôp ti, 1000 blăh hơ băn ao vei lăng, 200 tŏ giơng bơ ngai jĭ ƀĭch.... kŭm hăm 500.000 đô lar Mi jên tơ gŭm jên mong Vaccine yua đơ̆ng Thủ tướng teh đak Phạm Minh Chính tơ lĕch jang. Kơ dră tang măt Nguyễn Bá Hùng akhan, tơ drong tơ gŭm âu jĭ tơ ƀôh tơ drong hơ iă đơ̆ng tơ drong pơ vei tơ bôl kơ tang, 1 jơ hngơ̆m đon gĭt kăl, jang hơ dai tôm tơ drong đơ̆ng Việt Nam-Lào.

Thuem: Tơ blơ̆