VOV4.Bahnar - ‘Năr 23/3, Khŭl bơ̆ jang kơ Khŭl kơ dră chĕp kơ̆l pơ gơ̆r Anih jang Trung ương Mặt trận tổ quốc Việt Nam yua đơ̆ng Phŏ kơ dră Anih jang Trung ương Mặt trận tổ quốc Việt Nam Phùng Khánh Tài pơm Kơ dră khŭl hlôi hơ len lăng, dăr lăng tơ drong jang hơ met ăn pôk rơ̆ih Quốc hội jăl 15 păng bơ ngai tang măt Jơ nŭm pơ gơ̆r kon pơ lei tơ̆ rim tơ ring, jăl jang 2021-2026 tơ̆ dêh char Dak Nông. Kiơ̆ tơ roi tơ băt đơ̆ng Anih jang vei lăng pôk rơ̆ih dêh char Dak Nông, truh dang ei tơ drong jang hơ met ăn pôk rơ̆ih bơ ngai tang măt Quốc hội jăl 15 păng bơ ngai tang măt Jơ nŭm pơ gơ̆r kon pơ lei tơ̆ rim tơ ring jăl jang 2021-2026 lơ̆m dêh char hlôi đei tơ lĕch jang kiơ̆ ƀlep tơ drong hơ găt.

Lơ̆m dêh char hlôi pơ jing 2 Anih jang pôk rơ̆ih bơ ngai tang măt Quốc hội păng 14 Anih jang pôk rơ̆ih bơ ngai tang măt Jơ nŭm pơ gơ̆r kon pơ lei dêh char, 8 anih jang vei lăng pôk rơ̆ih Jơ nŭm pơ gơ̆r kon pơ lei tơ̆ apŭng, 71 Anih jang vei lăng pôk rơ̆ih Jơ nŭm pơ gơ̆r kon pơ lei tơ̆ xăh. Tơ̆ jơ bơ̆ jang hăm Anih jang vei lăng pôk rơ̆ih dêh char Dak Nông, Khŭl dăr hơ len, dăr lăng đơ̆ng Anih jang chĕp kơ̆l pơ gơ̆r Anih jang Trung ương Mặt trận tổ quốc Việt Nam tơ tă kơ Anih jang vei lăng pôk rơ̆ih dêh char athei tơ tom chă ƀôh, iung jang tang găn păng hơ met ‘lơ̆ng dôm tơ drong đei ƀôh hloi tơ̆ tơ ring vă ‘măng pôk rơ̆ih tơ pă jing năr lêh kơ đĭ đăng kon pơ lei.

Thuem: Tơ blơ̆