VOV4.Bahnar - Khŭl bơ̆ jang kơ Anih jang Trung ương Mặt trận tổ quốc Việt Nam yua đơ̆ng ƀok Phùng Khánh Tài – Phŏ kơ dră pơm kơ dră khŭl ‘nao đei jơ bơ̆ jang hăm dêh char Lâm Đồng găh hơ len lăng, dăr lăng tơ drong jang pôk rơ̆ih bơ ngai tang măt Quốc hội jăl 15, bơ ngai tang măt Jơ nŭm vei lăng kon pơ lei rim tơ ring jăl jang 2021 – 2026. Lăng atŭm tơ drong jang hơ met ăn pôk rơ̆ih tơ̆ Lâm Đồng đơ̆ng dêh char truh apŭng păng xăh hlôi đei jang kiơ̆ ƀlep tơ drong hơ găt.

Anih jang Trung ương Mặt trận tổ quốc Việt Nam hơ len lăng tơ drong jang pôk rơ̆ih tơ̆ lâm Đồng

Anih jang Đảng dêh char, Jơ nŭm pơ gơ̆r kon pơ lei, Anih jang pôk rơ̆ih dêh char hlôi kơ chăng pơ gơ̆r, tơ lĕch jang kiơ̆ rim tơ drong jang pôk rơ̆ih, tơ chĕng hơ len dôm tơ drong ‘nao pơ têng hăm jăl jang 2016 - 2021 vă pơ gơ̆r jang kiơ̆ ƀlep tơ drong hơ găt lơ̆m khôi luơ̆t, đơ̆ng noh pơ tho tơ lĕch jang kiơ̆ tơ̆ tơ ring vă hoei kơ mơ mat. Phŏ Kơ dră Anih jang Trung ương Mặt trận tổ quốc Việt Nam yua đơ̆ng ƀok Phùng Khánh Tài chih iŏk, lăng ‘lơ̆ng tơ drong jang hơ met ăn pôk rơ̆ih đơ̆ng dêh char Lâm Đồng. Anih jang Đảng, Jơ nŭm pơ gơ̆r kon pơ lei păng Anih jang pôk rơ̆ih dêh char kŭm hăm khŭl jang Mặt trận tổ quốc rim tơ ring hlôi pơ gơ̆r, tơ lĕch rim hla ar, trong tơ lĕch jang tơ tom, pơ gơ̆r dôm hop akŏm pơ ma dơ nuh ƀlep tơ drong, iŏk đei ‘mĕh vă tơ lĕch ăn. Lâm Đồng kăl kơ hơ nơ̆ng hơ tŏk dôm jơ nei hlôi iŏk đei, jang kiơ̆ vei sơ đơ̆ng khei ‘năr păng jang rim tơ drong jang pơ tăl dơ̆ng vă tơ drong jang pôk rơ̆ih tơ̆ tơ ring iŏk đei jơ nei ‘lơ̆ng hloh.

Thuem: Tơ blơ̆