VOV4.Bahnar – Khul kơpal jang hơlen kơ Anih juăt jang kơ Kuôk hô̆i, Jơnŭm pơgơ̆r pôk rơih kơ teh đak Yuơ Đại tươ̆ng Tô Lâm, jang lơ̆m Anih tơm Chĭnh trĭ, Ƀô̆ trưởng Anih tơm Kŏng ang, jang lơ̆m Jơnŭm pơgơ̆r pôk rơih kơ teh đak chĕp kơ̆l khul kơpal năm hơlen tơdrong jang pôk rơih bơngai tang măt ăn Kuôk hô̆i jăl 15 păng jang tang măt lơ̆m Hô̆i đŏng kon pơlei dôm jăl jang tơ̆ plei tơm Đà Nẵng.

Pơm kiơ̆ Tơchơ̆t kơsô̆ 119 đơ̆ng Kuôk hô̆i găh tơdrong pơjing jơnŭm pơgơ̆r tơring kơdrâ̆m păng minh ƀar trong pơkăp jang adrô̆ hơtŏk tơ iung plei tơm Đà Nẵng, jăl jang âu plei tơm Đà Nẵng ưh đei pơgơ̆r pôk rơih bơngai jang tang măt lơ̆m Hô̆i đŏng kon pơlei dôm tơring, adrô̆ pôk rơih bơngai jang tang măt ăn Kuôk hô̆i păng Hô̆i đŏng kon pơlei plei tơm, apŭng Hòa Vang atŭm hăm 11 xăh kơ apŭng Hòa Vang. Đại tướng Tô Lâm, jang lơ̆m Anih tơm Chĭnh trĭ, Ƀô̆ trưởng Anih tơm Kŏng ang, jang lơ̆m Jơnŭm pơgơ̆r pôk rơih kơ teh đak akhan, plei tơm hlôi keh đang trŏ khei năr pơkăp, hla bar tơchơ̆t pơma đam, xơkơ̆t hơnăn bơngai tăh hla, xek tơlang tơkêng tơhlâu đơ̆ng kon pơlei, tơroi tơbăt, vei xơđơ̆ng tơpôl, tang găn păng tơjră pơrang jĭ Covid-19. Đại tươ̆ng Tô Lâm pơkăl plei tơm Đà Nẵng akŏm vei xơđơ̆ng tơdrong vei xơđơ̆ng tơpôl lơ̆m khei năr pơgơ̆r pôk rơih, tơdrong tơm noh lơ̆m 'năr pôk rơih păng đơ̆ng rŏng kơ pôk rơih.

Lan chih păng pơre nơ̆r