VOV4.Bahnar - Kơ sơ̆ ‘năr 15/10, ƀok Nguyễn Phước Lộc - Phŏ kơ dră Anih krao hơ vơn kon pơ lei kơ Trung ương hlôi đei jơ bơ̆ jang hăm dêh char Bạc Liêu găh tơ drong jang tang găn jĭ COVID-19. Kiơ̆ tơ roi tơ băt, ‘măng jĭ ‘măng mă 4 tơ̆ Bạc Liêu đei 823 ‘nu jĭ SARS-CoV-2, đei 5 ‘nu lôch.

Ƀok Nguyễn Phước Lộc- Phŏ kơ dră Anih krao hơ vơn kon pơ lei kơ Trung ương pơ ma tơ̆ jơ bơ̆ jang

Tơ̆ jơ bơ̆ jang, ƀok Nguyễn Phước Lộc tơ băt, Anih krao hơ vơn kon pơ lei kơ Trung ương hlôi pơ gơ̆r krao hơ vơn tơ gŭm 4.000 kơ liêu păng tơ gŭm ăn khŭl jang pơ gang Bạc Liêu ƀet ăn kon pơ lei lơ̆m 2 năr, tơ̆ hơ năp kơnh gô hơ nơ̆ng jang kiơ̆ trong tơ lĕch jang tơ gŭm Bạc Liêu jăh ƀet tôm vắc xin ăn kon pơ lei. Hơ dai hăm ‘noh, Khŭl kŭm hlôi krao hơ vơn 1 anih jang mơ dro sa tơ̆ pơ lei tơm Hồ Chí Minh tơ gŭm Bạc Liêu 3.200 kơ dŭng hơ met F0 tơ̆ hnam hăm akŏp kơ jă 32 ti hlak jên, asong 100 kơ ƀĭnh ôxy kơ loăi 4 kơ lich.

Thuem: Tơ blơ̆