VOV4.Bahnar  – Kơsơ̆ 'năr brei (2/6), tơ̆ anih jang kơ Khul kơpal teh đak, pơgơ̆r tơdrong hop akŏm trư̆k tuyê̆n đơ̆ng Anih Pơgơ̆r jang kơ teh đak găh tang găn păng tơjră pơrang jĭ Covid-19 hăm Anih jang Y tê̆ păng Viê̆n Pasteur plei tơm Hồ Chí Minh, Phŏ Thủ tướng Vũ Đức Đam, Kơdră Anih Pơgơ̆r jang kơ teh đak pơkăl plei tơm Hồ Chí Minh pơtoi iŏk hơlen pham lơ̆m tơpôl kon pơlei, iŏk hơlen pham mă tơnăp tơ̆ dôm anih hơbuh pơrang hli hlơt, phŏ noh yua hloi robot krao điê̆n thoăi vă apinh jet gia jơhngơ̆m jăn vă kon pơlei tơroi y tê̆, đơ̆ng noh truh rim hnam iŏk pham hơlen dôm bơngai mă nhôm ƀơm jĭ. Ƀôh hơdăh tơdrong hơbĕch lơ̆m tang găn păng tơjră pơrang jĭ đơ̆ng plei tơm Hồ Chí Minh, Phŏ Thủ tướng Vũ Đức Đam pơkăl Anih Pơgơ̆r jang kơ teh đak kơ plei tơm iŏk hơlen pham vă dăh băt hrôih dôm anih hơbuh pơrang lơ̆m tơpôl. Phŏ Thủ tướng Vũ Đức Đam tơbăt hăm plei tơm, ăh mă pơrang jĭ hơbuh lang xă lơ̆m anih jang kŏng ngĭp, tơdrong tơlĕch pơkă tơring, tơklăh oei pha athei pơm jang kơjăp, khoa hŏk, tang găn tơpoh dih băl lơ̆m tơpôl.

Lan chih păng pơre nơ̆r