VOV4.Bahnar - “Bơngai tăh hla tơ̆ tơring nai truh oei lơ̆m tơring pơkăp oei pha noh đei tăh kơphĭu pôk bơngai jang tang măt ăn Kuôk hô̆i păng jang tang măt lơ̆m Hô̆i đŏng kon pơlei dêh char tơ̆ tơring noh”. 'Nâu jing minh lơ̆m dôm tơdrong pơtho 'nao đơ̆ng Anih jang pơgơ̆r pôk rơih kơ teh đak ăh năr 20/5, pơtruh ăn Anih pơgơ̆r pôk rơih tơ̆ dôm dêh char, plei tơm mă trung ương vei hơlen vih chă hơlen, xơkơ̆t xơnong tăh kơphĭu đơ̆ng kon pơlei tŏk bŏk oei pơm kiơ̆ pơkăp oei ataih băl vă tang găn păng tơjră jĭ Covid-19. Tơdrong xơkơ̆t xơnong năm tăh hla đơ̆ng kon pơlei tŏk bŏk oei pơm kiơ̆ pơkăp oei ataih băl tơ̆ dôm anih oei akŏm đei jang kiơ̆ pơkăp đơ̆ng Luơ̆t pôk rơih bơngai jang tang măt ăn Kuôk hô̆i păng jang tang măt lơ̆m Hô̆i đŏng kon pơlei păng dôm tơdrong pơtho đơ̆ng Anih pơgơ̆r pôk rơih kơ teh đak đei tơbang lơ̆m kơsô̆ 234 pơtho găh tơdrong chih hơnăn bơngai tăh hla păng trong tăh hla hăm dôm bơngai pơm kiơ̆ pơkăp oei ataih băl vă tang găn păng tơjră pơrang jĭ Covid-19 păng dôm tơring hơbuh pơrang jĭ. Hăm bơngai tăh hla tŏk oei pơm kiơ̆ pơkăp tơklăh oei ataih băl lơ̆m tơpôl dăh mă pơkăp kiơ̆ Tơchơ̆t kơsô̆ 16 đơ̆ng Thủ tướng teh đak mă tam đei hơnăn lơ̆m hla bar chih hơnăn bơngai tăh hla kơ tơring noh pơkăl Khul jang pôk rơih hơlen chih hơnăn bơngai âu păng pơtruh ăn Anih vei lăng kon pơlei tơ̆ xăh vă hơmet hơnăn bơngai tăh hla tơ̆ tơring tăh kơphĭu 'nao lơ̆m tơring tơklăh oei pha.

Lan chih păng pơre nơ̆r