VOV4.Bahnar - Khŭl kang ƀô̆, bơ ngai chih kơ tơ̆ng ang kơ Anih radiô nơ̆r pơ ma Việt Nam hlôi năm bơ̆ jang tơ gŭm tơ̆ dôm dêh char găh pơ băh dôm năr tơ ring pơ băh kơ rŭn tang găn jĭ. Ưh khan lăp hơ drô̆ hơ năp jang đĕch mă hăm bơ ngai jang chih kơ tơ̆ng ang vang năm bơ̆ jang hơ nhăk ba tơ drong jang, khŭm năm truh dôm hơ nih tơ̆ yơ vă tơ roi truh hăm buăl mơ̆ng brŏ dôm tơ drong kơ teh đak hăm plei nŭih hơ drin đơ̆ng bơ ngai chih kơ tơ̆ng ang kơ Radiô.

       Khŭl kang ƀô̆, bơ ngai chih kơ tơ̆ng ang năm jang tơ gŭm ‘măng âu ‘noh 12 ‘nu, năm tơ̆ pơ lei tơm Hồ Chí Minh păng dôm dêh char găh pơ băh yua đơ̆ng ƀok Phạm Mạnh Hùng, Phŏ Kơ dră dơ nơm vei lăng Anih radiô nơ̆r pơ ma Việt Nam pơm kơ dră khŭl. Khŭl đei hơ năp jang pơ gơ̆r, tơ roi tơ băt găh tơ drong jang tang găn jĭ Covid-19 păng 1,2 tơ drong lơ̆m brŏ, ti vi, hla ar chih kơ tơ̆ng ang kơ Anih radiô nơ̆r pơ ma Việt Nam.

        Kơ tă năm pơ lung khŭl kang ƀô̆, bơ ngai chih kơ tơ̆ng ang năm bơ̆ jang tơ gŭm tơ̆ dôm dêh char găh pơ băh, Kơ dră dơ nơm vei lăng Anih radiô nơ̆r pơ ma Việt Nam Đỗ Tiến Sỹ ‘meh vă đe bơ ngai chih kơ tơ̆ng ang hơ met ‘lơ̆ng mơ mat tat găh tơ drong unh hnam, oei sa, vang yak hơ dai hăm khŭl jang tang găn jĭ, vang tơ gŭm băl dôm tơ drong mơ mat tat ơh sơ ‘ngon đơ̆ng kon pơ lei, rim bơ ngai vă tơ gop iŏk đei tơ drong hơ găt tih hloh tang găn đei jĭ hơ buh.

        Kơ dră dơ nơm vei lăng Anih radiô nơ̆r pơ ma Việt Nam kŭm tơ ƀôh jơ hngơ̆m chôk hơ iă găh đe kang ƀô̆, bơ ngai chih kơ tơ̆ng ang, ‘meh vă bơ ngai chih kơ tơ̆ng ang năm jang tơ gŭm ưh khan lăp chih tơ roi tơ drong tơ drong plang jơ hngơ̆m, hơ drin đơ̆ng lơ kon pơ lei, khŭl y ƀak si, khŭl linh, kŏng an tŏk bŏk măng năr plang jơ hngơ̆m ăn tơ drong jang tang găn jĭ mă oei akŏm đei tơ drong hlôh vao vă đei dôm ƀai chih kơ tơ̆ng ang tơ găl hăm tơ drong gĭt kăl kơ teh đak:  

“Khŭl bơ̆ jang tơ gŭm ‘noh jĭ hơ nhăk nơ̆r pơ ma đơ̆ng Anih jang Đảng radiô, ‘nâu jĭ hơ nhăk tơ drong ‘lơ̆ng hơ drin đơ̆ng kơ dră chĕp kơ̆l anih radiô. Kŭm lui kơ đe sư jăh đei ƀai kơ tơ̆ng ang mă ‘lơ̆ng. Inh lui lơ̆m kơ plăh năm, đe sư gô băt păng sơng iŏk lơ tơ drong kơ tơ̆ng ang đơ̆ng tơ drong arih sa, đei lơ hla ar chih răk Anih radiô nơ̆r pơ ma Việt Nam kŭm hăm anih jang tơm tơ roi tơ băt đei đăi hơ nih ‘măn hla ar chih răk gĭt”.

         Tơ̆ lêh tơ lĕch jang, dôm bơ ngai chih kơ tơ̆ng ang năm jang tơ gŭm kơ Anih radiô nơ̆r pơ ma Việt Nam adoi tơ ƀôh jơ hngơ̆m khŏm vang jang hơ dai hăm rim khŭl jang tang găn jĭ, hơ drin tơ roi tơ băt găh jĭ hơ buh. ‘Meh vă đei lơ tơ drong kơ tơ̆ng ang, hơ iă găh tơ drong jang tang găn jĭ kơ teh đak. Bơ ngai chih kơ tơ̆ng ang Thành Lương, Grŭp joh yŏ, tơ pôl (VOV2):

“Tơ drong inh ‘meh vă hloh ‘noh jĭ hăm bơ ngai mơ̆ng brŏ kơ Radio nơ̆r pơ ma Việt Nam, mư̆h mơ̆ng tơ drong tơ roi đơ̆ng nhôn. Sơng iŏk dôm um rup nhôn gơ̆ih đơ̆ng hơ nih jĭ ‘noh đei đon lui, hiôk tơ̆ hơ năp kơnh”.

            Oei ‘nâu jĭ nơ̆r tơ roi đơ̆ng bơ ngai chih kơ tơ̆ng ang drŏ kăn Thi Uyên, Báo điện tử Anih radiô nơ̆r pơ ma Việt Nam (VOV.VN) :

-Inh hơ mĕng akhan inh gô chih tơ roi dôm um rup tơ pă hloh găh 1 pơ lei tơm tŏk bŏk arih păng tơ jră jĭ. Inh hlôi hơ met tôm đon tơ chĕng kiơ̆ đơ̆ng chăl tơ blăh đơ̆ng đe ƀok yă sơ̆. Hơ mĕng kơ dih kâu yak hloh khei ‘năr âu păng jing bơ ngai ƀôh kơ năl kơ jơ hnơr arih.

Lại Hoa - VOV1: Chih

Thuem: Tơ blơ̆